زامران، سبی ءُ مچ ءِ اُرشانی زمّہ وار بی ایل اے ءَ منّ اِتگ اَنت

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ وتی آفیشیل چینل “ھکل” ءَ زامران ءُ مچ ءَ پاکستانی پوج ءُ سبی ءَ ریل ءِ پٹی ءِ سر ءَ بوتگیں اُرشانی زمّہ واری منّ اِتگ اَنت –

جارکش جئیند بلوچ ءَ وتی درشان ءِ تہ ءَ گوشتگ کہ مئے سرمچاراں زامران ءَ زامری کور ءَ برجاھیں زورگیریں پاکستانی پوج ءِ پانگس ءِ سر ءَ دورجنگیں توپک ءَ گوں یک پوجی کارمندے نشانگ کُتگ کُشتگ-

آئی ءَ دیمتر ءَ وتی درشان ءِ تہ ءَ گوشتگ کہ دومی نیمگ ءَ مئے سرمچاراں سبی ءُ ناڑی گاج ءِ میانی دمگ ءَ ریل ءِ پٹی تراکناکیں شورواں گوں تباہ کتگ –

ھمے وڑ گوستگیں روچ ءَ مئے سرمچاراں مچ ءِ بازار ءِ ایف سی بنجل ءِ سر ءَ 82 ایم ایم گولہ آس داتگ کہ گوں سوبمندی ءَ وتی ٹارگٹ ءَ شُتگ ءُ کپتگ انت چریشی ءَ دژمن پوج ءَ جانی ءُ مالی تاوان بوتگ –