بلوچستان ءَ پنچ دگہ مردم آوار جنی ءَ پد بیگواہ ، یک جون ءِ دست کپتگ –

سربوتگیں ھالانی رِد ءَ پاکستانی پوج ءَ سبی ءَ چہ سَے ءُ ڈیرہ مراد جمالی ءَ یکے ءُ کراچی ءِ دمگ رئیس گوٹھ ءَ پنجگور ءِ جاھمندیں ورناھے آوار جتگ ءُ بیگواہ کتگ

گیشیں ھالانی رِد ءَ دو روچ ساری پاکستان ءِ چیریں ادارھانی کارمنداں سبی ءَ چہ حیات ء زنگی، اتور گورگیج ءُ ہاشم ڈومکی آوار جتگ ءُ بیگواہ کتگ انت -.

زانگ بہ بیت آوار جنی ءَ پد ہاشم ڈومکی کُشگ بوتگ ءُ آئی جون مَچ ءَ چگل دئیگ بوتگ –

شمبے ءِ سھب ڈیرہ مراد جمالی ءَ پاکستانی پوج ءَ محمد خان ء نبی بخش زورانسری آوار جتگ ءُ بیگواہ کتگ –

آوار جنگ بوتگیں مردمانی کھول ءِ رِد ءَ دمکی واکدار آھانی ارزی ءَ نبشتہ کنگ ءَ نہ انت ءُ آھانی دوستیگیں مردم چیریں جاھان برگ بوتگ انت – آھاں ھمے ترس انت کہ دگہ بیگواھیں مردمانی داب ءَ ایشان دروگیں میڑ ءِ نام ءَ مہ جن انت –

دومی نیمگ ءَ کراچی ءِ دمگ رئیس گوٹ ءَ پنجگور ءِ جاھمنند معراج ء عصا پاکستانی پوج ءَ زورانسری آوار جتگ ءُ بیگواہ کتگ

کھول ءِ رِد ءَ شپ ءِ ادار چار ءَ رءیس گوٹ ءَ ریجرز ءُ چاریں ادارھانی کارمندان گِس ءِ سر ءَ بیڑ برتگ ءُ ورناہ زورانسری آوار جتگ ءُ بیگواہ کتگ -.
زانگ بہ بیت بلوچستان ءَ زورانسری اوار جنی ءِ درچ یکشل ءَ برجاہ انت وھدیکہ ھپتگ ءِ بیت آوار جنیانی تہ ءَ گیشی اتکگ –

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ انت کہ بلوچستان ءَ تنی وھدی زورانسری آوار جنی ءِ درچ یکشل ءَ برجاہ انت ءُ سیاسی باسکانی دپ ءِ بند کنگے ھاتر ءَ آھاں آوار جنگ ءَ انت –

بلوچستان ءَ راجداریں گل ءُ انسانی ھکانی ادارہ اشانی اوار جنی ءِ الزام ءَ پاکستانی پوج ءُ چیریں ادارھانی سر ءَ لڈگ ءَ انت – دومی نیمگ پوجی واکدار اے الزامان رد کنگ ءَ انت