پاکستانی لشکرءِ بلوچستان ءِ دمگ کیچ ءَ گمانی بیڑ ءِ نیام ءَ پیسرءَ چہ زورانسری آوار جتگیں یک مردمے کُشگ بیگ ءِ ھال اِنت۔
پاکستانی پوج ءِ جارکش ءَ وتی شنگ کُتگیں درشان ءِ تہءَ ٹاہ داتگ کہ لشکریاں کیچ ءِ ھنکین بالگتر ءَ یک بیڑ یے نیام ءَ سلاہ بندیں گل ءَ چہ سیادی داروکیں سَے مردمانی کُشتگ اَنت کہ اشانی تہءَ کماندار سمیر پنام بحر، کماندار الطاف پنام لالک ءُ کماندار پھلان بلوچ ھوار اَنت۔
آئی ایس پی آر ءِ ٹاہ اِنت کہ سئیں مردم پنجگور ءُ بالگتر ءَ ھوار جتاھیں دمگانی تہءَ پاکستانی لشکریانی ھلاپ ءَ اُرشانی تہءَ ھوار بیتگ اَنت ءُ آئی ایس پی آر ءَ بیڑ ءِ نیام ءَ مزنیں کساس ءَ سلاہ ءُ بمب ءُ تراکناکیں شوروانی دزگیر کنگ ءِ ٹاہ داتگ۔
دی بلوچستان پوسٹ ءَ رس اتگیں اھوالانی رد ءَ لشکریانی دست ءَ مروچی بالگتر ءَ کُشگ بیتگیں الطاف ء جاڑان گوستگیں شپ ءَ چہ تجابان ءَ ھندی کشندہ ٹولی ءَ دزگیر کُتگ اَنت۔
ٹی بی پی ءَ ھندی اھوالاں گُشتگ کہ الطاف ء جاڑان ءَ سرکاری پشت پَد ءَ کارکنوکیں کُشندہ ٹولی میر یعقوب گروپ ءِ عقیل ءُ طارق ءَ دزگیر کُتگ ءُ لشکریانی دست ءَ داتگ ۔
زانگ بہ بیت بلوچستان دروگیں بیڑانی تہ ءَ اِشی ءَ پیسر ھم بازیں بیگواھیں مردم کُشگ بیتگ اَنت وھدیکہ مروچی بالگتر ءَ بیتگیں بیڑ ءَ دگہ دو مردمانی پجار ءِ درگت ءَ دنیگت گیشتر اھوال نہ رس اتگ اَنت۔