کراچی ءَ بیگواھیں مردمانی ھاتر ءَ زھرشانی برجاہ

بلوچ ءُ پشتون ریاست ءِ زوراکیانی آماچ انت – ماما قدیر بلوچ

زورانسری آوار جنگ بوتگیں سیاسی باسکانی یل کنائینگے ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ پنچ سد ءُ ھشتاد ءُ یک روچ سرجم بوتگ –

کراچی پریس کلب ءِ دیم ءَ برجاھیں زھرشانی ءَ مروچی پشتون تحفظ مومنٹ بنجاھی رھشون سرور جاوید، مسحود محمد ءُ شیر ءَ ھوار دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ گوشتگ کہ بلوچ ءُ پشتون ریاست ءِ زوراکیانی آماچ اَنت –

آئی ءَ گوشتگ کہ زلم ءُ زوراکیانی بگیری پُرایمنیں جُھد پیداک بوھگ ناگزیر انت ھاسکر پدا ھما چاگرد ءُ راج ءِ تہ ءَ کہ اودا آزاد ءُ باوقار ءُ مساوی ھیسیت ءَ زندگ بوھگ عمومی مزاج ءُ نپسیات ءِ خاصہ بہ بیت گڈا اودا ایردستی زوراکی جاور ھال دیراں نہ مان انت –

ماما قدیر بلوچ ءَ گوشتگ کہ نوآبادیاتی ریاستی پالیسی بندات بلوچ ءِ چکچینی بوتگ ءُ پدا رند ءَ چِست کن بجن ءُ چگل دئے پالیسی گیش کنگ بوتگ کہ روچ مروچی برجاہ انت – بلوچ ورناہ زورانسری آوار جنگ بوتگ انت ءُ چیریں جاھاں بندیگ کُتگ سک باز ازیت داتگ انت پدا شھید کُتگ ءُ زانگولیں جون چگل داتگ انت – اشانی شھید کنگ ریاست ءِ نیمگ ءَ پہ بلوچ ءَ ھمے پیگام بوتگ کہ بس توپک بلے بلوچ وتی راج ءِ ھاتر ءَ پُرایمنیں ءُ جمہوری وڈو ڈول ءَ ھم توار چست کنت اشی انجام ھم ھما بیت کہ دومیانی بوتگ –

آئی ءَ گوشتگ کہ ریاست مدامی لس مھلوک ءِ سر ءَ زوراکی کنت ءُ زوراکی ءَ چہ آھاں تُرسینیت –

ماما قدیر ءَ گوشتگ کہ بلوچستان ءَ بندات بوتگیں ریاست ءِ اے زوراکی ءِ پالیسی نوں سند ءُ پشتونخواہ ءَ ھم سربوتگ –