زھری ءَ پاکستانی پوج ءَ سَے ورناہ آوار جتگ اَنت

دی بلوچستان پوسٹ پتر ھال ءَ سربوتگیں ھالانی رِد ءَ پاکستانی پوج ءُ چیریں ادارھانی کارمنداں زھری ءَ دو برات زورانسری آوار جتگ ءُ بیگواہ کتگ اَنت –

گیشیں ھالانی رِد ءَ بلوچستان ءِ دمگ ھزدار زھری ءَ مروچی سھب ءَ پاکستانی پوج ءَ بیڑ برتگ ءُ دو برات آوار جتگ ءُ گوں وت بُرتگ اَنت وھدیکہ زھری ءِ دگہ یک ورنایے چہ شال ءَ آوار جتگ ءُ بیگواہ کتگ –

زھری سموانی ءَ مروچی سھب ءَ پوج ءِ دست ءَ آوار جنگ بوتگیں براتانی پجار سمیع اللہ ءُ چواد خان ء نصیر احمد ءِ ناماں چہ بوتگ اَنت – وھدیکہ چہ شال ءَ زورانسری آوار جنگ بوتگیں ورنا ءِ پجار زاکر ء تاج محمد ءِ نام ءَ چہ بوتگ کہ زھری کاھان ءِ نندوک بوتگ –

دمگی مردمانی رِد ءَ سئیں ورناہ پاکستانی پوج ءَ زورانسری آوار جتگ ءُ گوں وت برتگ انت کہ تنی وھدی انگت بیگواہ انت –

بلوچستان ءَ ھمک روچ زورانسری آوار جنگ بوگ ءِ درچ برجاہ انت – ھزدار زھری ءِ جھمنندیں دو ورناہ عرفان زھری ءُ قادر کنول ھم گوستگیں بازیں ماھاں چہ زورانسری اوار جنگ بوتگ انت کہ تنی وھدی انگت یل کنگ نہ بوتگ انت –

بلوچستان ءِ تہ ءَ بیگواھیں مردمانی جیڑہ روچ پہ روچ گیش بوان انت –

بلوچستان ءَ راجداریں پاٹی ءُ گلانی نیمگ ءَ گوستگیں بازیں وھدے ءَ آھانی یل کنائینگ ءِ کوشست برجاہ انت ءُ اشی ءِ ھمراھی ءَ شال ءُ کراچی ءِ پریس کلبانی دیم ءَ گوستگیں یک دھکے ءَ بیگواھیں مردمانی کھول زھرشانی کنگ ءَ انت –