عبدالحفیظ زہری ءِ زورانسری آوارجنی پدردی یے – بی ایس او آزاد

بلوچ نودربر آزاد ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ چہ متحدہ عرب امارات ءَ حفیظ بلوچ ءِ زورانسری آوار جنی ایرجتگ ءُ گوشتگ کہ متحدہ عرب امارات ءَ زورانسری آوار جنیانی درچ ءِ برجاہ بوگ پدردی یے – متحدہ عرب امارات ءَ لکانی کچ ءَ مردم نندوک انت وھدیکہ ھزارانی کچ ءَ بلوچ بلوچستان ءَ چہ روزگارے ھاتر ءَ یو اے ای ءَ شُتگ انت ، پاکستان ءِ گوشگ ءِ پد ءَ یو اے ای ءِ بلوچانی آوار جنگ پدردی یے اے ھمینچو ایرجنگ بہ بیت کم انت – یو اے ای ءَ بلوچانی آوار جنگ ءِ اے دومی وئیل انت چریشی ءَ چہ گمان بیت کہ ریاستی ایجنسیانی گوشگ ءِ پد ءَ دگہ مردم ھم آوار جنگ بنت – متحدہ عرب امارات بائدیں بلوچانی گوم ءَ ھزاراں سالی سیادی ءَ پاکستان ءِ گوشگ ءِ پد ءَ ھراب مہ کنت، عبدالحفیظ زھری ءَ پیش راشد حسین آوار جنگ بوتگ – اے وڑیں وئیلاں چہ ھزاراں بلوچانی دل آزاری بوتگ –

جارکش ءَ گوشتگ کہ دنیا ءِ تہ ءَ ایوک ءَ بلوچ راج جنگ ءِ آماچ نہ انت بلکیں ھر ھما جاہ ءَ کہ جنگ ءِ بندات بوتگ گڑا لس مھلوک ءِ پھریز ءَ پہ دنیا ءِ بازیں ڈیھاں وتی دروازگ پچ کُرتگ انت مروچی ھم ھزارانی کچ ءَ کُرد، اوگان، عراقی ءُ دگہ مردم دری ڈیھاں درپہ دری زند گوازینگ ءَ انت بلے دنیا ءِ تہ ءَ ھچ راج ءِ اے وڑ نشانگ کنگ بوگ ءَ نہ انت چوش کہ بلوچانی گوم ءَ بوگ ءَ انت – اگاں پاکستان تاکتوریں مُلکے ءُ دنیا ءِ بازیں مُلکانی پاکستان ءِ گوم ءَ نزیکی ھست بلے اے یات دارگ بہ بیت دنیا ءِ ھچ وڑیں راج مدامی ایردست کنگ نہ بیت انت – بلوچ راج گوم ءَ اے وڑیں گیر انسانی رویش دنیا ءِ ہیومن رائٹس آرگنائزیشنانی گوشتگیں گپانی چپ اِنت ما دنیا ءِ درسیں ڈیھانی سرکار ءَ چہ لوٹ کنیں کہ اگاں شما بلوچستان ءَ بؤوکیں اے زوراکیاں بلوچ ءِ ھمراھداری ءَ کُرت نہ کن اِت گڑا سامراج ءِ پلامرزی ءُ آئی ءِ گوشگے بلوچ راج ءِ بگیری ءِ لٹ ءُ پُل ءَ ھم ھوار مہ بئیت –

جارکش ءَ وتی درشان ءِ گڈسر ءَ متحدہ عرب امارات ءِ سرکار ءَ چہ لوٹ کتگ گوشتگ کہ عبدالحفیظ بلوچ پہ وشی یل کنگ بہ بیت ءُ آئی ءِ کھول آئی ءِ درگت ءَ سرپد کنگ بہ بیت اگاں آئی ءَ متحدہ عرب امارات ءِ کانودانی بگیری ءَ چشیں کارے کُتگ گڑا متحدہ عرب امارات ءِ آمیدگس ءَ آرگ بہ بیت – بلے آئی ءِ کھول ءَ تُرس اِنت راشد حسین ءِ وڑ ءَ عبدالحفیظ زہری ھم پاکستان ءَ دیم دیگ بیت اِنت – بھیسیت ایردستیں راج ما اے دمگ ءِ ڈیھاں چہ لوٹ کنیں وتی رویش ءِ سر ءَ چمشانک ءِ بدئینت پرچا کہ دنیا ءِ ھچ وڑیں سرپدیں مردم راہ مدامی ایردست نہ بیت انت –