نبشتانک: من ءَ پہ تو زھیر کنت
نبشتہ کار : جلال اهمد
دی بلوچستان پوسٹ
هما اِنت کہ تو رپتگے هما روچ ءَ چہ رند گْوش ئے ماه ءُ سال بدل بُوگ ءَ نہ اَنت، هما ماهکانی ءِ شپ هم بے چاڑ اَنت نوں منی شهرے موسم هم ابیتک اِنت ءُ زِر ءِ چول هم گمیگ اَنت بِہ گندئے چو منی پئیم ءَ منی شهر ءَ را هم پہ تو زهیر بُوگ ءَ اِنت ءُ شهرے هرچ دمک ءُ در تئی گندگ ءَ زَر اَنت-
هما جاگہ ءَ کہ من ءُ تو نشتگ ءُ مُدام دیوان کتگ نوں هما جاگہ ءَ کس نہ رؤت چیا.؟ کہ آ جاگہ ءَ لشکر ءَ وتی پانگس ءِ جوڑ کتگ ءُ هچ کس ءَ را اے اجازت نیست کہ همود ءَ شت بہ کنت ءُ هما دویں پُل کہ من ءُ تو کِشتگ اَت اَنت آ پُل هم چہ بے آپی ءَ مُرتگ اَنت ـ
تو کہ گِسر بُوتے گُڑا من میزان میزان هُوش ءُ بہ سار بُواں بُوت آں ءُ کدی گْوش ئے من وتی اندر ءَ گار اَت آں ءُ برے برے من چہ وت ءَ شِزار بُوان بُوت آں همے ڈول ءَ کسانیں مُدّتے گْوست گُڑا هما سنگت کہ چہ درکسانی ءَ منی همراه اَت اَنت آیاں هم منی سنگتی یل کت ءُ سرجمیں بازار ءَ منی نام گنوک بُوت گُڑا من وھدیکہ هاموش بُوت آں ءُ نِشتگ اَت آں دائم منی دوستی ئیں سنگتاں گْوشتگ اَت کہ ایشی ءِ همراه مہ بئیت اے وت وَ گنوک اِنت گنتِر شمارا هم گپچلے ءَ دور دنت ـ
یکے وَ تئی گم ءُ دومی سنگتانی تژن ءُ شگاناں روچ پہ روچ من ءَ توک ءَ چہ پُروشاں کت بلے من مُدام همے جُهد ءَ اَت آں کہ تو واتر اَلّم کائے ءُ من ءُ تو پد ءَ هُور نِندیں ءُ پیشی پئیم ءَ گپ ءُ تران کن ایں پہ تئی چارگ ءَ منی چم مُدام راهی اَت اَنت بلے تو واتر نہ کت نوں منی چمّانی رُوژنائی هم شُتگ ءُ پیشی ڈول ءَ کندگ ءُ مسکرائی هم نہ کن آں بس سرجمیں روچ کہ رؤت من وت ءَ گوں دُچاراں دائم من وت ءَ وت همے جُست ءَ کن آں کہ چیا منی واب سرجم نہ بیت؟ چیا من روچ پہ روچ هلاس بُواں آں؟
وهدے کہ من تئی گپاں دل ءَ کاراں گُڑا من ءَ اے سُد ءُ سما نہ بیت کہ من کے آں؟ همے دمان ءَ من انچیں هیالانی تہ ءَ گار باں گْوش ئے زاناں زندگی ءِ مستریں بُوج منی سر ءَ سوار اَنت چیزے روچ بیت کہ من ءَ انچو پہ تو زهیر بُوگ ءَ اِنت کہ دل دم پُہ سهت پہ تو تلوس ایت، بُوت کنت نوں من وتی زندگی ءِ گُڈّی ءَ ساه ءَ رس اتگ آں ءُ ملکموت من ءَ چہ اے دُگنیا ءَ بَرگ لوٹ ایت ءُ همے واست ءَ من لوٹاں کہ گُڈّی ساه ءَ ترا بِہ گِنداں چو مہ بیت کہ کیامت ءَ من گوں تو گِلہ بہ کن آں ـ
هر کجائے سلامت بات ئے پہ وتی مهروان ءَ کلوھے دیم بدئےـ
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔