رودراتکی بلوچستان ءِ جھمنند روکپتی بلوچستان ءَ تیرگواری ءَ بیران

سربوتگیں ھالانی روکپتی بلوچستان ءِ دمگ پیشین ءَ ناشناسیں سلاہ بندیں پرپٹ سوارانی تیر گواری ءَ رودراتکی بلوچستان ءِ باپاری مردمے بیران بوتگ –

گیشیں ھالانی رِد ءَ ناشناسیں سلاہ بندیں مردماں پیشین ءَ جلیل نامیں مردمے ءِ دکان ءِ دپ ءَ تیرگواری کُتگ تتکگ انت – چریشی ءَ رودراتکی ءِ بلوچستان تمپ ءِ دمگ گومازی ءِ جھمنند بیران بوتگ –

اھوالکار ءِ رِد ءَ بیران بوتگیں مردم ءِ پجار ھدابکش ء پھلان جھمنند گومازی ءِ نام ءَ چہ بوتگ – تیرگواری ءَ چہ آ سک ٹپی بوتگ کہ راسک نادراھجاہ ءَ برگ بوتگ اود ءَ آئی ءَ ٹپانی درد نہ سگتگ ءُ بیران بوتگ –

اھوالکار ءِ رِد ءَ ھدابکش لس ءُ باپاری مردمے بوتگ کہ بازیں وھد بیت رودراتکی بلوچستان ءَ جاور ھالانی نگیگی سوب ءَ در اتکگ ءُ شتگ –

روکپتی بلوچستان ءَ ھم سلاہ بندیں مردمانی تیرگواریاں رودراتکی بلوچستان ءِ مردم بیران بیتگ اَنت، سیاسی مردمانی گوشگ اِنت اے مردمانی کوشاں ریاستی چیریں ادارھانی نیمگ ءَ جوڑ بیتگیں گل کہ ڈیتھ اسکواڈ ءِ نام ءَ زانگ بیت اِنت ھوار اِنت-

بلے مروچی جنگ بیتگیں مردم ءِ کوش ءِ سبب زانگ نہ بیتگ –