لیاری لٹریری ءُ پولیٹیکل فیسٹیول آسر

بلوچ اسٹوڈنس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گوشتگ کہ لیاری لیٹریری ءُ پولیٹیکل فیسٹیول سوبمندی ءِ گوم ءَ آسر بوتگ بلوچستان ءِ سرڈگار ءَ چہ انتزامی درگت جتا کنگ بوتگیں بلوچانی دمگ لیاری ءَ سوبمندیں مراگش اڈ دئیگ دمگ ءِ تہ نوکیں ءُ دیمروئی لوٹگ باوست سوب جوڈ بیت –

آئی ءَ گوشتگ کہ ھب چوکی ءُ ڈیرہ غازی ھان ءَ پد گل نیمگ ءَ اے سیمی مراگش انت کہ اڈ دئیگ بوتگ کہ اشی ءِ تہ ءَ پد لیاری ءِ مھلوک ءُ ورناھاں مزنیں کچ ءَ بھر زرتگ کہ اودا یک نیمگے بلوچستان ءِ دائرہ کار ءَ ڈن بلوچانی دمگ ءَ بازینے بلوچ راجکاری یک ھد ءَ تاں یکر بوتگ انت ھمود ءَ مھکمیں درسیں دمگاں راج ءِ یک خلا برجم داشتگ – لیاری ءُ تونسہ ءَ اے وڈیں مراگش اڈدئیگ مول اے خلا ءَ پُر کنگ ءُ اے دمگانی ورناھاں تہ ءَ زانت رژن کنگ انت –

آئی ءَ گوشتگ کہ گوستگیں روچ ءَ لیاری ءَ برجم داشتگیں فیسٹیول بازیں چیزانی سر ءَ تران بوتگ کہ آئی تہ ءَ کراچی ءِ جاھمنندانی جیڑہ ءُ کراچی ءِ تہ ءَ بلوچ راجکاری گوست ءُ ھستیں وھد ءُ باندات بنگپ ءِ سر ءَ ھم تران بوتگ کہ بازیں راجدار ءُ چاگردی ءُ اھوالکاراں باوست کتگ – بلوچ نودربر راجکاری ءِ سر ءَ بی ایس او ءِ گوستگیں سرکماش ایڈوکیٹ عمران بلوچ ءَ وتی ھیال درشانتگ انت – لیاری ءُ بلوچستان ءِ دگہ دمگاں اتکگیں آرٹسٹاں وتی ازم درنگاز اِتگ ءُ مراگش ءَ بلوچستان ءِ ورناھیں پلم ساچ عرفان نور ءَ بلوچستان ءِ آثار قدیمہ ءِ سر ءَ جوڈ کتگیں ڈاکومینٹری پیش داشتگ مراگش ساز ءُ زیملی دیوان ءَ گوں آسر کتگ –

آئی ءَ گوشتگ مراگش ءِ بندات کراچی ءِ نندوکیں بلوچانی راجکاری کرد ءِ بنگپ ءِ سر ءَ باوست بوتگ کہ راجدار ءُ اھوالکار ھوار بوتگ انت کہ آھاں وتی ھیال درشانتگ انت اگاں بلوچ راجکاری ءِ گوستانگی پژدر چارگ بہ بیت گڈا کراچی بلوچ راجکاری ءِ بن ھشت زانگ بیت کراچی ءَ چہ بندات بوتگیں راجکاری وڈ ءِ نان وڈی ءَ بلوچستان ءَ سر بیت انت راجداریں گلانی راجکاری بہ بیت یا نودربرانی راجکاری کہ بلوچ راجکاری مجگ کراچی انت ءُ مدامی راجی راجکاری آبیاری کتگ بلے گوستگیں وھد ءَ دگہ جاھاں جاھمنندیں بلوچ جاورھال شوربندی ءَ گوں ھراب کنگ بوتگ انت ءُ مھلوک ءَ راجکاری ءَ چہ گستہ کنگے ھاتر ءَ این جی اویز سھارگ زورگ بوتگ کہ روچ مروچی برجاہ انت ءُ ھمے سوب انت کہ چریشی ءَ کراچی ءِ تہ ءَ بلوچ راجکاری ءِ راہ اڈاند پیدا کنگ بوتگ ءُ راجکاری سست روی آماچ بوتگ –

آئی ءَ گوشتگ کہ کراچی دمگی مردمانی جیڑہ برجم داشتگیں سیگمنٹ سیاسی ءُ چاگردی مردماں بھر زرتگ ءُ وتی ھیال درشانتگ انت آھاں گوشتگ کہ کراچی ءِ بلوچ راج یک مزنیں شھر ءِ تہ ءَ نشتگ انت بلے درپہ کسمپرسی زند گوازینگ ءَ لاچار انت ءُ آھاں بنکی ھک ھم دئیگ بوھگ ءَ نہ انت یک وھد ءَ ادے جاور ھراب کنگ بوتگ انت نوں ادے مردمانی گِس بلدوز کنگ بوھگ انت ءُ آھاں بے گس کنگے پندل کنگ انت لینڈ مافیا مردمانی زمینانی سر ءَ کبزہ کنگ ءَ انت دومی نیمگ ءَ لیاری ءِ مردماں بازیں اڈوجنجالانی آماچ کنگ ءُ آھاں درکنگے ھم پندل بوھگ انت – بلوچ راجدارایں ادارہ ءُ رھشوناں اے جاور ھال شری ءَ دلگوش کنگی انت اے جیڑھانی سر ءَ ھر تک ءُ پھناتاں توار چست کنگی انت راج وتی اعتماد ءَ زورگی انت دوبر پھال کنگے کوشست بہ بیت –

آئی گوشتگ کی دیوان ءَ بلوچ نودربرانی گوست، ھستیں وھد ءُ باندات ءِ راجکاری ءِ بنگپ ءِ سر ءَ بی ایس او ءِ گوستگیں سرکماش ایڈوکیٹ عمران بلوچ ءَ وتی ھیال درشانتگ ءُ جوانیں وڈی ءَ نودربر سیاست ءُ بلوچ نودربر سیاست گپ جتگ – آئی ءَ وتی تران ءَ گوستگیں وھد ءَ ودی بوتگیں ردی نودربرانی دیم ءَ پیش کت انت ءُ ورنا گوشت انت کہ باوست سیاسی ماھول جوڈ بہ کنت انت – دیوان ءِ گڈسر ءَ آرٹ پیشدارگ بوتگ ءُ سازءُ زیملی دیوان کنگ بوتگ کہ استاد ھمید شریف ءَ ھوار بوتگ –