بلوچی بُنگیجی درونت

بلوچی بُنگیجی درونت

ٹی بی پی درونت بلوچی

پہ بلوچی زبان ءِ نوک باھندیں وانوکانی ھاترءَ دی بلوچستان پوسٹ یک درونتی لڑے بندات کرتگ کہ چریشی ءَ بلوچی زبان ءَ ھُب داروکیں مردم چرے درونت ءَ چہ بلوچی زبان ءِ راست نبیسگ ءَ ھیل کُت کن اَنت-

مئے بنداتی درونت پہ وانوکاں شنگ بیگ ءَ اِنت، پہ بلوچی زبان ءَ بیوکیں ھمک جھد کہ بیت چُش کہ بلوچی نبشتانک ءُ شائراں آیانی چاپ کنگ ءَ ھوار نِی مئے وانوکاں درونت ھم دزکپت کن اَنت چریشی ءَ نبشتہ کنوکیں مردم گیشتر وتی سیاھگ ءَ راست ءُ تچکی ءَ نبشتگ کت کن اَنت-

اِنت، اَنت، ایں، ات ءُ ئے

اِنت: اے کُمکّار گالے پہ یک چیز ءُ مردمے ءِ واست ءَ کارمرز بیت۔

اَنت : اے چَہ یکے ءَ گیشترّیں چیز ءُ مردماں کارمرز بیت۔

ایں : پہ “ما” ءِ واست ءَ کارمرز بیت۔

اِت: پہ “شُما” ءِ واست ءَ کارمرز بیت۔

 ئے : پہ “تو” ءِ واست ءَ کارمرز بیت۔

بیا اِت نی ما رھدربری گالِرداں (Examplary Sentences) کمیں دلگوش ءُ ھیل بہ کن ایں۔

1- ماگُل بُز ءَ دوشَگ ءَ اِنت۔

2- چینی شپچراں ور اَنت۔

3- اندلیب پمیشکا مونجا اِنت۔

4- اپسانی تاچینگ ءِ لیب ءَ بورتاچی گْوش اَنت۔

5- تو راجی جُھدکارے ئے۔

6- تو وَ دیر کنگ ءَ ئے۔ 

7- ما چہ کروس ءِ بانگ ءَ گوں دبوجی نہ کن ایں۔

8- ما وَ راجی زُبان ءِ ھزمتکار ایں!

9 تو وَ راج ءِ دوزواھیں رھشُونے ئے۔

10- تو زاناں پہ کَے ءَ نمدی یے نبیسّگ ءَ ئے؟

11- تو بلوچی درونتاں وانان ءَ دربر ئے۔

12- تو زاناں کُج ءَ روگ ءَ اَت ئے؟

13- ساکب ءُ ھارس ماں بالیگراب ءَ سپرے ءَ روگ ءَ اَنت۔

14- ما پہ راجی آجوئی ءَ کوھاں سر گِر ایں۔

15- شُما زاناں چی ءَ ھبکّہ اِت؟

16- شُما دوئیں دُزّ اِت پمیشکا تچگ ءَ اِت۔

18- شُما دْراہ یکجاہ اَت ات۔

19 شُما وانگ ءَ اَت ات۔

پہ راجی زُبان ءِ دیمروئی ءَ ما شُمئے مھر ءُ ھمراھداری لوٹ ایں-