بلوچ اسٹوڈنٹس ارگنائزیشن ءِ بنجاھی جارکش ءَ وتی شنگ کُتگیں درشان ءِ تہءَ گُشتگ کہ بلوچ نودربر اَے وھدءَ مُلک ءَ کجام ھم نہ رکیتگ اَنت۔ کجام ھم اناگتی وئیل ءِ پشدر ءَ استانی ادارگانی اولی نشانگ ھواریں دروشم ءَ بلوچ نودربر کنگ بنت کہ اے انسانی اگبالانی لگتمالی اِنت۔
بلوچ نودربر بلوچستان ءَ بہ بنت یا مُلک ءَ کجام ھم ھندی ءَ بہ بنت گوں آیاں زوراکی کنگ ءُ گیر انسانی رویہ ءِ آماچ کَنگ ایر جنگی کردگار اِنت۔
آئی ءَ دیمترءَ گُشتگ کہ چُشیں تعصبی کردگار ءُ ادارگانی کاروائی بلوچ نودربرانی تہءَ ردوم زیروکیں ھما تُرس ءَ گیشتر کنگ ءَ اِنت کہ آ ھچ جاہ ءَ نہ رکیتگ اَنت ءُ اے تُرس بلوچ نودربرانی دلپروشی ءِ سوب جوڑ بیت کنت۔
جارکش ءَ گُشتگ کہ ما چہ واکداراں دزبندی کنیں کہ بلوچ نودربرانی ھلاپ ءَ تعصبی ھواریں سزا دیگ ءِ گامگیجاں بہ دار اَنت ءُ بلوچ ءُ پشتون نودربرانی ترسینگ ءِ یکشلی دارگ بہ بیت دانکہ نودربر وتی وانگ ءَ ابید کجام ھم تُرس ءُ بیھار برجاہ داشت بہ کن اَنت۔