پنجاپ پولیس ءَ اے ٹاہ داتگ کہ کاؤنٹر ٹیررزم ڈیپارٹمنٹ (سی ٹی ڈی) ءَ لاھور ءَ یک کاروائی ءِ وھد ءَ ناگتی انارکلی بازار ءَ بمب تراک ءَ ھواریں دو کمکارانی پجار کنگ ءَ پد دزگیر کتگ اَنت-
پاکستانی رسانکدر ءِ رد ءَ کاؤنٹر ٹیررزم ڈیپارٹمنٹ ءِ یک کارندھے ءَ رسانکدراں گوں گوشتگ کہ سی ٹی ڈی ءَ لاھور ءِ ھند راوی دگ ءَ گوستگیں روچ ءَ انار کلی بازار ءَ تراک ءَ ھواریں دو کمکار دزگیر کرتگ ءُ پَٹ ءُ پول ءَ ناشناسیں جاھے ءَ برتگ اَنت-
چہ لاھور ءَ شنگ بیتگیں آنلائن روتاک ڈیلی اردو ءِ رد ءَ پَٹ ءُ پولی کارمنداں سی سی ٹی وی کیمراھانی کمک ءَ گندوکی یکجاہ کرتگ چریشی ءِ انار کلی ءَ تراک ءَ ھواریں مردمانی پجار بیتگ اَنت-
زانگ بہ بیت گوستگیں روچ ءَ انار کلی بازار ءَ ترندیں تراکے بیتگ اَت چریشی ءِ آسر ءَ سَے مردم بیران ءُ بیست ءُ شش زدگ بیتگ اِت اَنت ءُ اے اُرش ءِ زمہ واری آجوئی دوستیں گل “بلوچ نیشنلسٹ آرمی ” ءَ منّ اِتگ اَت-
انار کلی ءِ تراک ءَ پد پولیس ءَ لاھور ءَ وانوکیں بلوچ ءُ پشتونانی ھاسٹلانی سر ءَ بیڑ برتگ ءُ پنجاپ ءَ وانوکیں نودربرانی رد ءَ پولیس ءَ شپ ءَ بیڑ برتگ ءُ ھاسٹلانی کوٹیانی پَٹ ءُ پول کرتگ ءُ نودربر ترسینتگ اَنت-
گیشیں ھالانی رد ءَ چہ لاھور ءَ پولیس ءَ دو بلوچ نودربر دزگیر کرتگ ءُ ناشناسیں جاھاں برتگ اَنت کہ آیانی پجار عمران ءُ شعیب ءِ ناماں زانگ بیتگ اَنت ءُ دگہ یک نودربرے ءِ آوار جنگ ءِ ھال اِنت کہ آئی ءِ پجار سمیر ءِ نام ءَ زانگ بیتگ –
لاھور پولیس ءَ انار کلی بازار ءَ تراک ءَ گمانی ءَ ھواریں ھچ کسی پجار انگت ءَ پدر نہ کرتگ اَنت-