بلوچستان: ترندیں گوات ءِ سبب ءَ پسنی ءَ دیوالے ءَ ھوار کمبہ کپتگ اَنت

پسنی ءَ ترندیں گوات ءِ کشگ ءِ سبب ءَ وارڈ نمبر پنچ ءَ یک دیوالے ءِ ھواری ءَ کمبہ ءِ ھم کپتگ ءُ چریشی ءَ دگہ جانی تاوانانی ھال نہ بیتگ اَنت-

مکران ءِ بازیں جاھاں ترندیں گوات ءِ ھواری ءَ دنز ءُ مُج اِنت چریشی ءَ بازیں جاھاں دگانی سر ءَ پھریزی جم کڈن کنگ بیتگ اَنت ءُ رؤکیں مھلوک ءَ اے گوشگ بیتگ کہ اے وھد ءَ وتی پھریزی ءِ ھواری ءَ دگہ مردمانی پھریزی کنگ بہ بیت –

مکران مولم شناس ءِ رد ءَ مکران ءِ دمگاں ترندیں شمال ءِ کشگ ءَ پد گمان بیگ اِنت کہ اے گوات وتی سر ءَ گوریچ ءَ دنت ءُ باندا کیچ، پنجگور، ھزدار، آواران، سبی، سوراب ءُ چاگی ترندیں گوریچانی زد ءَ اتکگ کنت –

مولم شناس ءِ رد ءَ چریشی ءَ بلوچستان ءَ سارتی ءِ زور ھم گیش بوت کنت –

مولم شناس ءِ رد ءَ مروچی شپ ءَ شال، نوشکی، چمن، زیارت، مسلم باغ، لورالائی، ڈیرہ بگٹی، بارکھان ءُ ڈیرہ گازی خان ءِ کش ءُ گوری دمگاں ھور ءِ گمان ھم ھست اِنت ءُ اشی ءِ ھواری ءَ شال ءِ کش ءُ گوری دمگاں برپگواری ءِ گمان ھم ھست اِنت-

چاگردی ترامجاھاں شنگ بیتگیں تامرانی تہ ءَ گندگ بیت مکران کوسٹل ھائی ءِ پسنی ءِ ھند ءَ بسے کساسیں دنز ءُ مُجاں گپتگ ءُ روانی ءِ واستا دگ پھزداراں مھلوک پھریزگ ءِ کڈن کرتگ اَنت-