بیگواھیں ورنایاں ھوشاپ ءِ وئیل ھوار کنگ ریاست ءِ بے سوبی ءُ انساپ ءِ گون ءَ ملنڈی اِنت – بلوچ یکجھتی کمیٹی

بلوچ یکجھتی کمیٹی ءَ وتی شنگ کرتگیں درشان ءِ تہ ءَ گشتگ کہ اُستانی وزیر داکلہ ءَ پریس کانفرنس ءَ پیسر ءَ بیگواہ کن بیتگیں مردماں ھوشاپ ءِ وئیل ءَ دزمانجن کنگ ءِ پژدر ءَ زھر درشان کنان ءَ گوشتگ کہ وھدیکہ ریاست انساپ ءِ گپ ءَ جنت گڑا ریاست ءِ انساپ ءِ جاہ ءَ گیش ناانساپیانی تہ ءَ ھوار کنت بلوچانی واستا ریاست ءَ کانون ءُ انساپ مزاکے جوڑ کتگ چریشی ءَ زانگ بیت اِنت بلوچستان ءِ مردمانی زندگیانی نھاد چی اِنت –

جارکش ءَ گشتگ ھوشاپ ءَ وھدیکہ سیکورٹی پورسز ءَ گولہ آس داتگ اَنت ءُ زھگ شھید بیتگ اَنت کھول انساپ ءِ واستا ھوشاپ ءَ چہ تربت ءُ پد ءَ تربت ءَ گرانیں سپر کنگ ءَ پد دیم پہ شال ءَ انساپ ءِ واستا اتکگ اَنت لاشانی ھمراھی ءَ نندانک اش جتگ دانکیں جرمکار ایف سی ءِ زمہ واراں کانون ءِ چیر ءَ بیار ایت ءُ مارا انساپ بہ دنت بلے بدبھتی ءَ شھیدانی ھونکارانی گرگ ءَ ابید دگہ چار بے میاریں بلوچ گپتگ ءُ بندیگ کتگ اَنت ءُ آیاں تاوان دیگ ءِ پیسلہ کنگ بیتگ وھدیکہ زھگانی راستیں کشندہ ایف سی اِنت اے سرجمیں جرمکاری ءِ واستا مھار گٹ ءَ دیگ بیتگ اَنت – اے وڑیں رنگ ءَ ریاستی انساپ بلوچانی سر گاری اِنت، ھا سرکار ءُ ھاکم اے کلوہ ءَ دیگ لوٹ اَنت انساپ ءِ واستا زھرشانی ءِ پژدر ءَ گیش ناانساپیانی دیمپانی کنگ کپ ایت-

جارکش ءَ گشتگ کہ چہ ھوشاپ ءَ گوستگیں ماہ ءِ شانزدہ دسمبر ءَ سیکورٹی پورسز ءِ آپریشن ءَ پنچ مردم بیگواہ کنگ بیتگ اَنت چریشانی تہ ءَ ایاز ء نیک سال، اویس ء حسین بلوچ، نبیل ء ھاشم، سفر بلوچ ء جمعہ خان ءُ لطیف ء صالح بلوچ ھوار اَنت پد ءَ چار مردم دزگیری ءِ تہ ءَ دارگ بیتگ اَنت بلے آیاں یل کنگ ءَ ابید ھوشاپ ءَ زھگانی کوش ءُ دگہ مردمانی نشانگ کنگ ءِ زمہ واری ءَ لڈگ ءَ اَنت اے سراسر زُلم ءُ ناانساپی یے ءُ کھول ءَ ھم اے ورنا ھوشاپ ءِ وئیل ءَ دزمانجنی ءِ رد کتگ اَنت –

جارکش ءَ گشتگ کہ ھواریں جرمکارانی گرگ ءُ سزا دیگ ءَ ابید اے بے گناھیں مردماں گرگ ءُ آیاں کشندہ پدر کنگ استانی سرکار ءُ سیکورٹی ادارھانی بے سوبی ءُ آیانی نادلجمی ءِ یک منّانکے، اگاں ھاکمانی اے رویش بلوچانی بیت گڑا بلوچ اے ڈیھ ءَ انساپ ءِ گرگ ءَ یلو کن اَنت کوٹ ءُ آمیدگس وتی بے تواری ءَ بہ پروش اَنت سرکار ءَ اے جستانی پسواں بہ لوٹ اَنت کجام کانون ءِ تہ ءَ ھواریں جرمکار یلو کنگ بیتگ اَنت ءُ بے گناھیں مردم گرگ بیتگ اَنت ءُ ھوشاپ ءِ وئیل ءَ دزمانجن کنگ بیتگ اَنت اے رنگیں وئیلاں بلوچستان ءِ مھلوک ءِ دلاِ پاکستان ءِ تہ ءَ انساپ ءِ جاہ ءَ کندگ کیت اِنت ھوشاپ ءِ وئیل ءِ ھلاپ ءَ مھلوک جنز اِت ءُ کھول ءِ نیمگ ءَ آمیدگساں ھواریں مجرمانی نام ءَ ارزی ھم نبشتگ کنائینگ ءِ کتگ ات بلے ھواریں مجرمانی گرگ ءَ ابید دگہ چار بے گناھیں مردم گرگ ءُ آوار جنگ بیتگ اَنت –

جارکش ءَ گڈسر ءَ گشتگ کہ چار ورنایانی یل کنگ ءِ لوٹ ءَ کن ایں اگاں سرکار ءُ ھاکماں اے ھمت نیست اِنت آ ھواریں جرمکاراں گپت نہ کن اَنت گڑا اے وئیل ءِ بارو ءَ بلوچانی گون ءَ دگہ گیش مزاک مہ کن اِت-