ندر اِنت پہ وتن آجوئی ءِ جُھدکار ءَ
لچہ: اسد ابدال
دی بلوچستان پوسٹ
دیم پہ منزل راہ روان بی سرمچار بس ھچ مگُش
باتن ءِ مارشتاں دنیا ءِ بہ مار بس ھچ مگُش
بے توارءُ بے چڑکّہ بید ءِ پادبرمش ءَ درا
دوست ءُ دشمن درستاں شر پجّا بیار بس ھچ مگُش
پہ وتن آجوئی ءَ پکر ءَ بتاچین ءُ بگوز
برات بِل بند اَنت ترا بُھتام ھزار بس ھچ مگُش
تو کئے ءَ کُھتیگ کنئے ءُ تو کئے ءَ ایمن اِدا
آ کہ تئی مات اِنت اگاں اے تئی گُھار بس ھچ مگُش
وھد ءِ اے کوکّار ءُ واھی دائم ءَ است اَنت ءُ بنت
تو تمردی دشمن ءِ دیم ءَ بدار بس ھچ مگُش
جنگجاہ ءَ کئے مریت ءُ کئے تچیت انگت کُج اِنت
گپ جنت بلّے تئی دست ءِ سگار بس ھچ مگُش
تو وتی جُھد ءَ بدار پہ سِتک مُھکم کن دل ءَ
آجزی دستاں پہ اللہ ءَ شھار بس ھچ مگُش
مَرگ دست ءَ دنت پہ بچکندگ برو گوں پہ وتن
زندگی وھدے ترا کنت بے کِمار بس ھچ مگُش
بامسار وت پہ ترا ملّان بیت کئیت اِنت بلے
تو شپ ءِ پُشت ءَ وت ءَ مَھتل بدار بس ھچ مگُش
اینچو دروگ ءُ پندل ءُ بُھتام ءُ گپ اے چی وڑے
تو اڑئے ابدال نی ربّ ءَ بچار بس ھچ مگش