کیچ: پوج ءَ بیڑ برتگ ءُ پنچ مردم آوار جتگ ءُ برتگ اَنت

بلوچستان ءِ دمگ کیچ تمپ ءَ گوستگیں شپ ءَ پوج ءَ بیڑ برتگ ءُ پنچ مردم آوار جتگ ءُ گوں وت برتگ اَنت-

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ءِ دمگ کیچ ءِ ھند تمپ گومازی ءَ پاکستانی پوج ءَ گوستگیں شپ ءِ ساھت چار ءَ بیڑ برتگ ءُ پنچ مردم آوار جتگ ءُ برتگ اَنت-

آوار جنگ بیتگیں مردمانی پجار یوسف ء ھاجی اکبر، شکیل ء ھاجی وشدل، نواز ء مراد مھمد، شعیب ءُ دوست ء منیر ءِ ناماں زانگ بیتگ اَنت –

دمگی مردماں گوں ٹی بی پی ءَ گُشتگ پوج ءَ گوستگیں شپ ءِ ساھت چار ءَ بیڑ برتگ ءُ لوگانی تہ ءَ جاڑیگیں زالبول ھم کمشرپ کتگ اَنت ءُ چریشی ءَ پد پنچ مردم برتگ اَنت –

دمگی مردمانی رد ءَ گوستگیں سال ءَ یوسف ھاجی اکبر ءِ گس ھم پوج ءَ وتی چوکی جوڑ کرتگ ءُ چریشی ءَ داں یوسف ءِ لوگ پوج ءِ دستیگی ءَ بیتگ –

زانگ بہ بیت بلوچستان ءِ جتا جتائیں جاھاں پوج ءِ نیمگ ءَ مردمانی آوار جنگ ءِ درچ یکشل ءَ برجاہ اَنت ءُ دومی نیمگ نیمگ ءَ گوستگیں روچاں وائس فار بلوچ مسنگ پرسنز ءِ رھشون سمی دین ءَ ھم وتی یک شنگ کرتگیں درشانے ءَ بیگواھیں مردمانی کھولاں گوں دزبندی کتگ ءُ گوشتگ کہ کھول وتی مردمانی کیساں گل ءَ سر بہ کن اَنت-

سمی بلوچ ءَ گشتگ کھول اگاں وتی کیساں گل ءَ سر مہ کن اَنت گڑا بیت کنت آیانی مردماں گیشتر تاوان بیت کنت ءُ چریشی ءَ کیسانی سر بیگ ءَ ما آیانی کیساں کانونی رنگ ءَ دیم ءَ برت کن ایں –