ھاران ءَ زالبول ءِ آوار جنگ ءُ زوراکی کنگ ءُ کوش ءِ درگت ءَ دلجمیں پَٹ ءُ پول کنگ بہ بیت – بلوچ وومن فورم

بلوچ وومن فورم ءِ جارکش ءَ وتی شنگ کرتگیں درشان ءِ تہ ءَ گوشتگ بلوچستان ءَ یکشلیں ناانساپیانی نہ کٹوکیں درچ یکشل ءَ برجاہ اَنت چریشی ءَ سرکار، انتزامیہ ءُ کانونداریں ادارھانی دیم ءَ شھمات اَنت-

آئی ءَ گُشتگ کجام ھم ڈیھ ءَ ایمنی ھما وھد ءَ نئیت اِنت دانکہ مھلوک ءِ گون ءَ انساپ نہ بیت اِنت-

جارکش ءَ گشتگ بلوچستان ءَ زالبولانی سر ءَ بیوکیں زُلم ءُ زوراکی برجاہ اَنت اے باز بژنینگ ءُ دردیگیں گپ اَنت اگاں سرکار زالبولاں برابری ءُ بنکی آسراتیانی واھشت اِنت گڑا زالبولاں شرپ ءُ پھزاداری ءَ ستکی بہ کنت-

جارکش ءَ میڈیا رپورٹ ءِ رد ءَ گپ کنان ءَ گوشتگ گوستگیں روچاں ھاران ءَ یک زالبولے لیویز ءِ کارمنداں آئی ءِ لوگ ءَ چہ آوار جتگ ءُ برتگ ءُ آئی ءِ گون ءَ سِلکاری بیتگ ءُ پد ءَ بے دردی ءَ کشگ بیتگ ءُ ناشناسیں جاھے ءَ کل کنگ بیتگ گوستگیں روچاں زالبول ءِ لاش دزکپتگ ءُ آئی ءِ پجار بیتگ –

آئی ءَ دیمتر ءَ گوشتگ کہ زالبول ءِ گون ءَ بیوکیں زوراکی زالبولانی واستا سرکار ءِ دروگیں ٹاہ ءُ مھلوک ءَ بے وکوپ کنگ ءَ ابید دگہ ھچ نہ اِنت-

اشی ءَ پیسر جامعہ بلوچستان ءُ شال وڈیو اسکینڈل ءِ وئیل ءِ دیدانک ھمے نیمگ ءَ برگ اِنت زالبولانی واستا بلوچستان ءِ وڑیں جاہ گیرمھپوز کنگ بیتگ اَنت اے ھما جاہ بیتگ زالبولانی دیم ءَ آیگ ءَ جنگ دارگ بیتگ اَنت-

جارکش ءَ دیمتر ءَ گشتگ کہ سرجمیں بلوچستان بدامنی ءِ تہ ءَ گوزگ ءَ اِنت بلوچستان جنگلے جوڑ بیتگ ھمود ءَ گریب ءُ بزگیں مھلوک ءِ واستا ھچ انساپ نیست اِنت سرکار سرجمی ءَ بدامنی، کشت ءُ کوش ءُ زالبول ءُ چکانی پھزداری ءِ واستا ٹوھیں گام چست بہ کنت-

جارکش ءَ گڈسر ءَ گشتگ کشگ بیتگین ءِ کشندہ دزگیر ءُ ترندیں سزا دیگ بہ بنت اسرمندیں کھول ءَ انساپ دیگ بہ بیت اِنت کشندہ تُری کجام رنگ ءَ بالا بہ بیت بلے کانون درستانی واستا برابربہ بیت اِنت –