بیران بوتگیں سنگت ءَ دروت ندر کنیں – بی این ایم

بلوچ نیشنل مومنٹ ءِ جارکش ءَ شال ءَ بیران بوتگیں پاٹی ءِ دیریگیں باسک مھران بلوچ دروت ندرکتگ گوشتگ کہ مھران بلوچ شال ءَ پاٹی ءِ جوانیں کارکنوکیں باسک ءِ بوتگ کہ آ سال دوھزار یانزدہ ءَ پاکستانی پوج ءَ زورانسری آوار جتگ ءُ بیگواہ کتگ بوتگ ءُ ھشت سالاں ازیت دئیگ پد سال دوھزار نوزدہ ءَ پاکستانی پوج ءَ یلا داتگ ـ زندانان بازیں ازیتاں چہ آ سک باز نزور ءُ نادراہ بوتگ بلے آئی ھوسلہ برجاہ بوتگ – مھران بلوچ بازیں الاج ءَ پد ھم وش نہ بوتگ ءُ سَے روچ پیسر شال ءَ مار ءَ چہ جُتا بوتگ، آئی جھد ءُ گڈی ساہ ءَ تاں پہ گل ءَ داتگیں آئی ءِ دیمونیاں دروت ندر کنیں ءُ کول کنیں کہ پاٹی آئی مشن ءَ گڑی منزل سر کنت ءُ ساہ کشیت –

آئی ءَ گوشتگ پاکستان ءِ رستری ءِ ھچ ھد ءُ سیمسر نیست پاکستان ءَ زلم زوراکی ءِ سرجمیں سیمسر سرگڑ کرتگ انت بلے بلوچ پرزند زندانی بہ بنت یا پڈ ءَ آھانی کربانی تمردی ءُ جزبگ ءَ ناکہ تھنا پاکستان بلکہ سرجمیں دنیاء پیام داتگ کہ ما وتی راجی آجوئی ءَ پہ ھچ وڈیں کربانی دئیگ چک ءُ پد نہ بئیں –

جارکش ےَ گوشتگ کہ مروچی مھران ءِ وڑیں بلوچ پرزند دژمن زوراکیانی زندگیں درور انت دژمن ءَ بلوچ راج ءِ یک پدریچ ءِ زندانی کتگ بلے بلوچ راج ءَ دژمن باور کنائینتگ ما اجوئی ءِ گرگ ءَ تاں دیمھونی راجدپترے نویس ایں –