دی بلوچستان پوسٹ پتر ھال ءَ سر بیتگیں ھالانی رد ءَ ڈیرہ مراد جمالی ءَ وت ماں وتی جنگاں دو بُگٹی ورناہ بیران ءُ یکے ٹپی بیتگ۔ دمگ ڈیرہ بگٹی، سوئی میتگ ءِ دو ورنا مھمد کپِیل ء چاکر باگلانی، داد اُلہ باگلانی کُشگ ءُ کپیل ءِ مستریں بْرات تارک ء چاکر باگلانی سک ٹپی بوتگ اَنت۔ بیران بیتگیں ورناہ مھمد کپیل بُگٹی بلوچستان یونیورسٹی ءِ نودربر ءُ وتی دمگ ءِ یک چاگِردی ھزمتکارے بیتگ۔
دمگی ھالکارانی رِد ءَ دمگی وڈیرہ میوہ نوتانی ءِ زھگ نورا بُگٹی ءَ پہ بیرگری ءَ وتی دُژمن میرگُل نوتانی راہ بستگ ءُ بے سمائی ءُ رَدی ءِ آسر ءَ نوتانی ٹکر ءَ باگلانی ٹکر ءِ موٹلے نشانگ کُرتگ ءُ چریشی ءَ یک لس بلوچ ورنایے بیران ءُ ٹپی بیتگ ۔
دمگی مردمانی رد ءَ ڈیرہ بگٹی ءِ سرجمیں میتگاں داں سے سال ءَ گوں پوج ءَ ھچ جنگ ءُ جیڑہ نیست پمیشکا پاکستانی پوج ءَ وتی پانگِس ھالی کُتگ ءُ پشتونستان ءُ بلوچستان ءِ دگہ دمگ جنگی آپریشناں شُتگ اَنت۔ اے وھد ءَ ڈیرہ بگٹی ءَ ناں بلوچی رواج ءُ ربیدگ ءِ رِد ءَ بلوچی جِرگہ ءُ میڑمرکھے نَیکہ پاکستانی کانودی رِد ءُ رھبندے ھست کہ اے جیڑہ ھلاس بہ بنت چمیشکا اود ءَ یکشل ءَ پوج ءِ پلہّ مُرز، سرجھل بوتگیں مردم ماں وت جنگ ءَ اَنت کہ تھنا بلوچ راج ءِ بدبھتی ءُ بیرانی اِنت۔