بلوچ، بلوچی زبان ءَ دست ئِے وت گار ءُ بیگْواہ کنت
نبشتہ کار: شاھد اھمد
دی بلوچستان پوسٹ
تَھنا بلوچ بوگ درد نہ وارت بلوچ ءَ بلوچی زبان وانگ لوٹ اِیت بیدے زبان ءَ راج وتی راجی پجار ءُ وتی زند ءِ ھر تک ءُ پَھنات ءَ دیم بُرت نہ کنت۔
بلوچستان ءَ بلوچ راج ءِ راجدپتر ءَ وتی راجی زبان ءِ تہ ءَ سرپد کنگ المی اِنت بلے چون سرپد اِش کن ئے وھدیکہ تو وتی راجی زبان ءَ سرپد بہ ئے گڑا! زیردستیں راجاں وتی زیردستین زبان زوراور ءِ دست ءَ وتی زبان ءِ لگتمالی چون دیستگ ءُ چون رَکّینتگ؟ او بلوچ! ترا وتی سر ءُ چِٹّ گِرگ لوٹ اِیت بہ گند ئے تئی ھمراھداری ءَ کس گون مہ بیت بلے ترا وتی بلوچی زبان چَہ زوراور ءِ دست ءَ رَکّینگی اِنت پرچاکہ تئی راجی پجّار تئی گوں زبان ءَ بندوک اِنت۔
مُجّتی ما گِند ایں بلوچستان ءِ ھند ءُ دمگ ءِ نندوکیں ھر بلوچ ءَ کہ وتی گالوار ءُ نبشتانک ءِ تہ ءَ دری راجانی گالاں کارمرز کنگ ءَ اَنت تو وتی زبان ءِ گار کنگ ءِ مستریں سبب دگہ چے بوت کنت کہ تو وت وتی جند ءَ گوں دری زبان ءُ دود ءُ ربیدگ ءَ ھوار کنگ ءَ ئے۔
وانگجاھاں مئے کسانیں چُکاں دری زباناں وانینگ بوگ اَنت اے وڑ ءَ بلوچیں چُکے مَجگ ءَ چنچو سان دَور دنت۔
منی جُست گوں شمارا ایش انت کہ پرچا مئے ماتی زبان وانگجاھاں وانینگ نہ بیت ؟
ایشی ءِ متلب ایش اِنت کہ بلوچ راج ءَ گوں آئی زبان ھم ایردست اِنت ءُ میزان میزان ءَ گار بوان بہ بیت انچوشکہ بلوچستان ءِ نوکیں، آؤکیں پدریچ ھمے ھساب ءَ آیان بہ کنت ءُ آئی ءِ نئیکہ تَھنا ءَ آئی ءِ دود ءُ ربیدگ سان بہ گِیپت بلکیں آئی ءِ زبان ھم گار ءُ بیگْواہ بہ بیت۔
داں کہ بلوچ وت وتی زبان ءَ نہ پَھریز اِیت ، نہ پَھم ایت چون تو ایردست بوھان بہ ئے بہ چار ھمے گالوار کہ مئے دپ ءَ کارمرز بوگ اَنت دری زبانانی گڑا ما ایشاں چِتو بہ پَھریز ایں مارا وت ءَ راجی زبان ھست گڑا ما پرچا وتی راجی زبان ءَ نہ وان ایں؟
دری ملکاں نندوکیں بلوچاں ھما ملکانی زبان دربرتگ اَنت ءُ شان ءِ گوما پَھر بند اَنت کہ ما بلوچیں تَھنا بلوچ درد نہ وارت بلوچاں وتی ماتی زبان ءِ تہ ءَ ھبر ءُ نبشتہ کنگ زیب دنت ناں کہ دری راجانی وت ءَ ھوار کنگ ءَ وت ءَ بلوچ گْوشگ بْراھدار لیک اِت۔
شال ءَ بلوچستان زندگ بات ءُ بلوچ ءُ بلوچی زبان دیمروئی بہ کنات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔