چہ بلوچستان شھدربر جاہ ءَ آوار جنگ بوتگیں نودربر انگت بیگواہ انت – نودربرانی زھرشانی

چہ بلوچستان شھدربر جاہ ءَ زورانسری آوار جنگ ءُ بیگواہ بوتگیں نودربر سھیل بلوچ ءُ فصیح بلوچ ءَ دو ماہ پرگوستگ انگت بیگواہ انت –

زورانسری آوار جنگ بوتگیں نودربرانی یل کنائینگ ءِ ھاتر ءَ بلوچستان شھدربرجاہ ءِ نودربراں زھرشانی روانک ءِ کش اتگ –

سھیل بلوچ ءُ فصیح بلوچ گوستگیں سال ءِ یک نومبر ءَ بلوچستان شھدربر جاہ ءِ ھاسٹل ءَ چہ سیکورٹی پوج ءَ زورانسری آوار جتگ ءُ بیگواہ کتگ انت کہ آھانی بیگواھی ءَ دو ماہ گوستگ انگت یل کنگ نہ بوتگ انت –

شھدربرجاہ ءِ نودربرانی زورانسری آوار جنی ءِ بگیری ءَ ایندگہ نودربر وھد وھد ءِ سر ءَ زھرشانی کنگ ءَ انت نودربراں لوٹ کتگ کہ آھانی سنگت دیم ءَ آرگ بہ بنت ءُ پہ وشی یل کنگ بہ بنت –

بلوچستان شھدربر جاہ ءِ نودربرانی زورانسری آوار جنی بگیری ءَ نودربرانی الائنس نیمگ ءَ چہ ءَ اشی ءَ پیش بازیں روچاں بلوچستان شھدربر جاہ ءِ درسیں زانشتی کارانی سر ءَ بندش ننداک جتگ ءُ نشتگ انت بلے پد ءَ سرکار ءِ باور کنائینگ ءَ پد نودربرانی الائنس ءَ وتی زھرشانی ھلاس کتگ –

بلے مروچی بلوچستان شھدربرجاہ ءِ نودربراں شاھدربرجاہ ءِ تہ ءَ روانکے کش اتگ ءُ سھیل بلوچ ءُ فصیح بلوچ ءِ یل کنگ ءِ لوٹ کتگ –

زھرشانی کنوکانی گوشگ ات کہ شھدربرجاہ ءَ چہ زورانسری آوار جنگ بوتگیں سھیل بلوچ ءُ فصیح بلوچ تانکہ زاھر کنگ نہ بنت یا سرکار نودربراں یل نہ کنائینیت زھرشانیانی درچ برجاہ بنت اِنت –

بیگواھیں سھیل بلوچ ءُ فصیح بلوچ ءِ یل کنائینگ ءِ ھاتر ءَ نودربر گلانی نیمگ ءَ شاھدربر جاہ ءِ تہ ءَ سرکل ءِ ھم اڈ داتگ کہ آئی ءِ جنک ءُ بچکیں نودربراں ھوار درسیں گلانی باسک ءُ رھشوناں بھر زرتگ –