نبشتانک: بلوچاں گوں زُلم بوگ ءٙ اِنت
نبشتہ کار: کادر ھسرت
دی بلوچستان پوسٹ
دگنیا ءِ تہ ءٙ بازیں راجے ھست کہ، آ لوٹ اٙنت مئے راج وانندگ، زانتکار ءُ ندکار جوڑ بہ بنت داں ما یک زور آوریں راجے بہِ بہٙ ایں چہ ھمے راجاں یک راجے ھست کہ بلوچ ءِ نام ءٙ زانگ بیت۔ اے راج ءِ ھم لوٹ ھمیش اِنت کہ مئے ھُمک کس وانندگ، زانتکار ءُ ندکار جوڑ بہ بنت وتی نٙد ءٙ کارمرز بہ کن اٙنت داں ما ھم یک زور آوریں ءُ تپاکیں راجے جوڑ بِہ بٙہ ایں ءُ مئے راجی زبان گار ءُ بیگواہ مہ بیت۔
بلوچیں زھگانی پت پہ وتی زھگانی وانینگ ءِ ھاتر ءٙ شپ ءُ روچ کار کن اٙنت لھتیں لِچ کاری کنت لھتیں ماں کارجاھاں رو اٙنت ءُ مزدوری کن اٙنت داں مئے چُک ماں شریں وانگجاھاں بہ وان اٙنت ءُ شریں نامے ءِ واھُند بہ بنت پہ وتی گُلزمین ءُ راجی زُبان ءِ پھازگ ءِ ھاتر ءٙ ند ءٙ کارمرز بہ کن اٙنت داں مئے ھم کُپت سُبک بہ بنت۔ پد ءٙ لھتے نودربرانی پِت ءُ برات رو اٙنت ماں ڈنی مُلکاں کہ ما چیزے بہ کمائین ایں ءُ مئے چُک ءُ برات بہ وان اٙنت ءُ پہ وتی گُلزمین ءٙ چیزے بہ کن اٙنت- لھتے انچیں نودربر ھست کہ آیانی پِت چہ اے دگنیا ءٙ رٙپتگ اٙنت، گْوھار ءُ پیریں مات اِش شپ ءُ روچ گُد دوچ اٙنت پہ یک مرادے وتی زھگاں شال، اسلامآباد، پنجاب ءُ دگہ جْوانیں وانگجاھاں دیم دے اٙنت کہ مئے برات ءُ چُکانی ماں چاگرد ءِ تہ ءٙ شریں نامے بہ بیت، بہ وان اٙنت کہ وتی زمین ءِ گماں بہ مار اٙنت۔
ُبٙلے مئے گُلزمین ءِ سر ءٙ چوش نہ اِنت مئے مات ء گْوھارانی دل ءِ مراد نا سرجم بوگ ءٙ اٙنت چی ءٙ کہ انوں ریاست ءٙ یک انچیں پندلے ساز اِتگ، مارا چہ وانگ ءُ زانگ ءٙ زبھار کنگ ءٙ اِنت مئے بلوچ نودربراں چہ وانگجاھاں چِست کنت ءُ بارت ماں زندان ءٙ بند کنت سال ءُ سِن گْوز اٙنت بٙلے ایشانی ھال نئیت۔
ریاست ءٙ ھمے گپ وتی مجگ ءٙ نندارینتگ کہ ما بلوچ نودربراں تکانسر کن ایں بِلے دلپروش بہ بنت وانگجاھاں یل بہ دے اٙنت بے وانندگ بہ بنت اے یک بے زانتیں راجے جوڑ بہ بیت ءُ در پہ در بہ بیت بٙلے چوش نہ بیت دژمِن بے سوب بنت۔
گار ءُ بیگواہ بوتگیں بلوچانی مات ءُ گْوھار دگانی سر ءٙ زھرشانی کن اٙنت ءُ گریو اٙنت وداریگ اٙنت انگت پہ وتی لاڈکیں زھگ ءُ براتاں کہ ماں زندان ءٙ بندیگ اٙنت۔
نیکہ بلوچیں ماتانی چماں واب ھست نیکہ گْوھارانی چماں واب ھست پُریں واب ءٙ بُست کن اٙنت ءُ گریو اٙنت بازیں ماتانی چم بازیں گریوگ ءٙ کور بوتگ اٙنت۔
آ دگہ ملک ءِ زھگانی مات ھمے جیڑ اٙنت کہ باریں کدیں مئے زھگ کا انت چہ وانگجاھاں، کارجاھاں ءُ یا کہ چہ پکنک ءٙ گس ءٙ واتر بنت۔ بٙلے مئے گُلزمین ءِ سر ءٙ مئے مات ھمے جیڑ اٙنت کہ مئے چُک باریں کدیں چہ زندان ءٙ آجو بنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔