چہ ھوشاپ ءَ دزگیر بیتگیں مردماں ھوشاپ وئیل ء گوں ھچ سیادی نیست، مئے کشندہ ایف سی اِنت – کھول

الم بوانیت

ھوشاپ ءَ سی ٹی ڈی ءِ دست ءَ گرگ بیتگیں زھگاں ھوشاپ وئیل ءَ گوں ھچ سیادی نیست اِنت مئے زھگانی کشندہ ایف سی اِنت اے زھگاں رسترانی ڈول ءَ کش ایت ءُ ایف سی وتی رستریانی چیردیگ ءِ جھد ءَ اِنت اے گپانی درشانی ھوشاپ ءِ وئیل ءَ اسرمند بیتگیں کھول ءَ مروچی تربت پریس کلب ءَ سول سوسائٹی تربت ءِ کنوینر گلزار دوست ءِ ھمراھی ءَ پریس کانفرنس کنان ءَ گشتگ اَنت-

آیاں پریس کانفرنس کنان ءَ گوشتگ اے گپ میڈیکل رپورٹس ءَ راست بیتگ زھگانی مرگ گرنیڈ ءَ نہ بیتگ مارٹر گولھاں چہ بیتگ ءُ اے مارٹر ایف سی ءَ آس داتگ اَنت-

پریس کانفرنس کنان ءَ آیاں گشتگ اے وئیل ءِ درگت ءَ ھرچ پَٹ ءُ پولے کھول، آل پارٹیز کیچ ءُ سول سوسائٹی کیچ ءَ کتگ آیاں وتی اے پَٹ ءُ پول ءَ گشتگ اے مردم ایف سی ءِ نیمگ ءَ آس دیگ بیتگیں مارٹر گولھاں شھید بیتگ اَنت نِی آیاں یک دگہ پندلے سازینتگ ءُ سی ٹی ڈی دروگ بندگ ءَ اِنت ءُ گرگ بیتگیں ایاز بلوچ، اویس بلوچ، نبیل بلوچ، سفر بلوچ ءُ لطیف بلوچ زھگانی کشندہ نہ اَنت سول سوسائٹی، آل پارٹیز ءُ کھول اے گپاں رد کنت زھگانی کشندہ ایف سی اِنت ءُ ایف سی ءِ زمہ واریں مردم گرگ بہ بنت ءُ مارا انساپ دیگ بہ بیت اِنت-

زانگ بہ بیت اکتوبر ءِ ماہ ءَ کیچ ءِ دمگ ھوشاپ ءَ ناگتی مارٹر گولھانی آس دیگ ءَ دو زھگ بیران بیتگ اِت اَنت کشگ بیتگیں زھگانی کھولاں اے بھتام جتگ اَت اے زھگ پوج ءِ نیمگ ءَ آس دیگ بیتگیں مارٹرانی آس دیگ ءَ بیران بیتگ اَنت –

زھگانی کوش ءِ ھلاپ ءَ سرجمیں بلوچستان ءَ ترندیں رنگے ءَ زھرشانی بندات بیتگ اَت اشی ءَ ھوار ھوار سدانی کچ ءَ زالبول ءُ زھگاں بندات ءَ کیچ ءُ پد ےَ شال ءَ لاشانی ھواری ءَ زھرشانی کرتگ اَت-

ھوشاپ وئیل ءِ درگت ءَ بلوچستان ھائی کورٹ ءِ بینچ ءَ اے پیسلگ کنان ءَ سرجمی ءَ پَٹ ءُ پول ءِ پرمان کتگ اَت ءُ ڈی سی کیچ حسین جان، اے سی کیچ عقیل کریم نائب تھسیلدار ھوشاہ رسول جان درکتگ اِت اَنت –

ھمے وڑ گوستگیں روچ ءَ ایف سی ءَ شانزدہ دسمبر ءَ ھوشاپ ءَ بیگواہ کنگ بیتگیں چار مردم سی ٹی ڈی ءِ دست ءَ پدر کرتگ ءُ آیانی ھلاپ ءَ ھوشاپ ءِ وئیل ءَ ھوار دگہ ناشری بھتام لڈ اِتگ اَنت-

اے درگت ءَ مشیر داکلہ بلوچستان میر ضیاء اللہ لانگو ءَ شمبے ءِ روچ ءَ شال ءِ پریس کلب ءَ ڈی آئی جی کرائمز برانچ ءِ وزیر خان ناصر ءِ ھمراھی ءَ پریس کانفرنس کنان ءَ گوشتگ دہ اکتوبر دوھزار ءُ بیست ءُ یک ءَ ھوشاپ ءَ گرینڈ تراکے ءَ دو زھگ شھید بیتگ اَنت اشانی کھول ءُ دگہ مردماں سیکورٹی پورسز اے وئیل ءَ ھواری ءِ زمہ جتگ بلوچستان ھائی کورٹ ءِ گوشگ ءِ سر ءَ کرائمز برانچ ءَ وئیل ءِ پَٹ ءُ پول کنان ءَ بنجاھی جرمکار نبیل ھاشم ءَ ھوار دگہ چار مردم دزگیر کتگ اَنت-

ضیاء لانگو ءِ رد ءَ بی ایل ایف ءِ گوشگ ءِ سر ءَ تربت ءَ بازیں ناشریانی زمہ اش زرتگ اَنت آئی ءَ گشتگ سی ٹی ڈی اے وئیل ءِ سر ءَ تچک اِنت چریشی ءِ سر ءَ آئی ءَ وتی بیان شنگ کتگ –

آئی ءَ گشتگ سیکورٹی پورسز وتی جاناں ببا دیگ ءَ اَنت مھلوک ءِ پھزداری ءَ کنگ ءَ اَنت لھتے مردم اے کربانیاں بے ھیال کن اَنت پوج ءَ را بے بنیں بھتام جنگ ءَ اَنت نِی راستی پدر بیتگ-

بلوچستان لبریشن فرنٹ ءَ وتی شنگ کرتگیں درشانی ءَ گشتگ بلوچستان پولیس ءِ پریس ریلیز دروگ ءَ چکار اِنت-

بی ایل ایف ءِ جارکش ءَ گشتگ ھوشاپ ءِ وئیل کجام رنگ ءَ پیش اتکگ اشی ءِ راستی کشگ بیتگیں زھگانی کھول ءُ دمگی مردماں زھگانی لاشانی ھمراھی ءَ شال ءَ اتکگ ءُ سرجمیں دنیا ءِ دیم ءَ پدر کرتگ اے سادگیں مزلومانی کشندھانی دزگیری، آیانی ھلاپ ءَ دروگیں ارزی ءُ دروگیں کول دیگ بیتگ ءُ زھرشانی ھلاس کنگ بیتگ سرجمیں دنیا ءَ دیستگ – اے راستی ءَ ھرکس زانت فوج، ایف سی ءُ چیریں ادارہ نا کہ کجام وتگڑیں سویلین سرکار ھوار اَنت نا کینگرو کورٹس ءِ پسو کار اَنت اے وتگڑیں ادارہ نا ایوک ءَ وتی ڈیھی دستور یا کجام کانون ءُ راستی ءُ نا انسانی ھکانی آجوئی ءِ درگت ءَ میانی اُستمانی پابند اَنت-

نوکتریں