بے کساسیں مھر- جلال اھمد

نبشتانک: بے کِساسیں مھر

نبشتہ کار: جلال اهمد

دی بلوچستان پوسٹ

مِهر یک اَنچیں چیزے کہ کِساس کنگ نہ بیت اِشی ءِ کَچ ءُ کِساس ءَ کس زَانت نہ کنت مِهر یک اناگت ءَ انسان ءِ اندر ءَ چہ ودی بیت منی هیال ءَ دُگنیا ءِ تُوک ءَ انسان ءَ را سے چیز ءَ گوں بے کِساس مِهر اِنت-

اے منی هیال اَنت کہ من پدّر کنگ ءَ آں ءِ بُوت کنت منی گپّاں گوں شُما تِپاک مہ کن اِت بُوت کنت منی گپ شُمئے پھم ءَ مہ کپ اَنت چیا کہ دُگنیا ءِ تُوک ءَ هرچ انسان یک جِتائیں پِگر ءُ سُوچے ءِ واهُند اِنت ءُ هر مردم ءِ هیال ءُ لِیکہ جِتا اَنت –

منی هیال ءَ دُگنیا ءِ توک ءَ سِے مستریں مِهر اَنت چے یکّے هما مِهر اِنت کہ ترا گوں وتی مات ءَ بیت دومی هما اِنت کہ ترا گوں یک جِنکے ءَ گوں بیت ءُ سیمی هما اِنت کہ ترا گوں وتی ماتیں گلزمین ءَ بیت بِزاں کہ ترا گوں وتی زمین ءَ مِهر بیت اے سَے چیز اَنت گوں انسان ءَ را بے کِساس مِهر بیت اِنت-

یک انسانے ءَ را گوں وتی مات ءَ چون مِهر بیت؟ مات هما اِنت کہ نُھ ماه ءَ داں وتی چُک ءَ لاپ ءِ تہ ءَ جاه دنت چینچو بزّگی ءُ واری برداشت کنت نُھ ماه ءَ رند هما چُک دُگنیا ءِ تُوک ءَ کیت ودی بیت دان پُرّیں دو سال ءَ مات وتی گوراں چے شیر وارینیت ئِے ءُ انچو سمبالیت ئِے دان هما چُک مزن بیت ءُ دُگنیا ءِ رِپکاں سرپد بیت گڑا وتی دستاں چیر بیت ءُ وتی مات ءَ را سمبالیت بِچار دُگنیا ءِ توک ءَ هما مردم ءَ گوں انسان ءَ را مِهر بیت کہ آ هم ترا مِهر دنت گڑا همے پیم ءَ مِهر یک کَچے ءَ تاکت ور بیت چیا کہ دو مردم ءِ میان ءَ مِهر هست آ ترا انچو مِهر دنت ءُ تو آئی ءَ نوں بِچار زندگی تُوک ءَ انچیں ماتانی بَچ هست اَنت کہ آه نِشاه ءِ آماچ اَنت وتی زندگی ءَ برباد اَنت دگُنیا ءَ هچ ءَ سرپد نہ اَنت بلے هما چُک کہ مات ءِ گورا رؤت گڑا آ مات ءَ دل ءَ منی چُک ءَ چے شرتِر کس نیست نوں مات ءَ مِهر ءَ بِجار بے کِساس اِنت همے وڑ ءَ چُک ءَ را وتی مات هم سک دوست اِنت بِچار هر وهد ءَ چُک کہ وتی گِس ءَ رؤت گڑا دِگے کسّی گورا نہ رؤت بلے وتی مات ءِ گورا هرچ هال ءَ رؤت ءُ هر انسان ءَ را وتی مات ءَ گوں بے کِساس مِهر اِنت بے مات ءَ گُش ئے زان آں مردم ءِ زند نا سرجم اِنت مات چُک ءِ چراگ اِنت ءُ اے چراگ انسان ءِ زندمان ءَ رُوژناه کنت ءُ بے کِساس ڈولدار ءِ کنت-

دومی بے کِساسیں مِهر گوں هما جِنک ءَ بیت کہ تو پہ همائی ءَ زرے پہ آئی ءَ گنوک بئے کہ من ءَ پلانی باز دوست بیت من لوٹ آں کہ آ منی بہ بیت وهدے کہ اول سر ءَ تو جِنک ءِ گِندے کہ آئی ءِ لُنٹ سُهر سُهر اَنت ءُ مُود اِش انچوش بَز اَنت وهدے کہ کندگ ءَ لَگّ ایت گُل اِش کنڈ بنت ءِ هما هساب ءَ ڈولدار اِنت کہ گپ نہ بیت تو کہ وهدے آئی ءِ اداه ءُ زیبائی ءَ گِندے گڑا تئی بے تاهیریں دل ءَ تاهیر رس ایت گُش ئے زان آں دل ءِ گم ، رنج ءُ پریشانی هلاس بنت بس هما دل ءِ توک ءَ جاه کنت ءُ دل ءَ آرام دنت بِچار زندگی ءَ توک ءَ مردم ءَ را وهدے کہ چیزی ءِ تلب بیت گڑا انسان مُدام همے کوشست ءَ کنت کہ منا پِلان چیز بے رس ایت کہ منی هما تلب اِنت آ سرجم بہ بیت تلب کُجام وهد ءَ سرجم بیت؟ هما وهد ءَ سرجم بیت کہ تئی دل ءِ هاجت ءُ زرورت سرجم بنت زندگی یک کسانیں مُدّتے ءِ بلے اِشی ءِ توک ءَ انسان مدام جُهد ءَ اِنت کہ منی زندگی وش هال بہ بیت گڑا هما جِنک ءَ گوں ترا وهدے کہ بے کِساس تو دائم همائی ءِ ترانگ ءَ کپ ئے بلے وهدے کہ آ گوں تو دُچار کپ ایت گڑا ترا کہ هما گپ کنگی اَنت تو آواں گُشت اِش نہ کن ئے تو مُدام همے جُهد ءَ کن ئے کہ دِگہ روچ ءِ گُشان ئِے گُشے زان آں تو وهدے کہ همائی ءَ گوں دیم پہ دیم بئے تئی گورا لبز هلاس بنت تو بس همے ودار ءَ کن ئےکہ آ گپ بِکنت من بس گُوشدار آں اے وڑیں مِهر اگاں کسے ءَ را گوں جِنکے ءَ بہ بیت آئی ءِ ارمان سرجم مہ بنت آ گنوک بیت بے کِساسیں مِهر همیشی ءَ گُش اَنت-

سیمی مِهر گوں انسان ءَ را وتی زمین ءَ بیت زمین انسان ءِ وتن اِنت انسان ءِ مات اِنت اے هما مات اِنت کہ سرجمیں زندگی ءَ ترا یل کُرت نہ کنت دان مرگ ءَ رند هم ترا وتی سُورومگیں هاک ءِ وشبو ءِ باهوٹ کنت یک ماتے ءِ زمین ءِ مِهر هم بے کِساس اِنت هما بچّاں کہ پہ اے هاک ءِ هاترا وتی سر ندر کُتگ ءُ هاک ءِ شیداه بُوتگ اَنت آواں وتی جان داتگ زمین ءِ هکّی اِیں شیدائی هما بیت کہ پہ زمین ءَ گنوک بیت دائم پہ وتی زمین ءِ هاترا جیڑ ایت ءُ وتی زمین ءِ سمبالگ ءَ کوشست کنت هما کہ دراں ڈیه اَنت آواناں چے وتی ءَ کشّگ ءُ زبهر کنگ بیتگ هما آں جُست کن کہ آوانی جاور چون اَنت پہ دِگرانی گلام جوڑ بُوگ ءَ وتی زمین ءِ سمبالگ هر انسان ءِ سر ءَ اَلّم اِنت چیا کہ اے مات ترا نیم راه ءَ یل نہ کنت داں کیامت تئی همراه بیت-

اے نبشتانک ءِ تہ ءَ من سِے چیز ءَ گوں بے کِساسیں مِهر ءِ گپ ءَ پدّر کنگ ءَ آں منی متلب اِش اِنت کہ دُگنیا ءِ توک ءَ همے سَے چیزاں گوں انسان ءَ را بے کِساس مِهر بیت بُوت کنت منی گپ رد بے بنت بلے منی هیال ءَ مستریں ءُ ٹوهیں مِهر گوں همے چیزاں بیت اِنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔