آزاد لچہ: تژنانی بوج
لچہ کار : اسد ابدال
دی بلوچستان پوسٹ
مھتلاں پمیشکا کہ من وتیگی شر زانتگ بند داری اوں کرتگ،
بس وتی دل ءِ نہ کتگ،
ھو بہ زان پمیشکا من مرچی ایوک ءُ تھنا یکیں جاگہ ءَ اوشتوک،
کس نہ کنت وتی ماراٍ کس نہ کنت دپی جُستے،
دیر اِنت تئی شگانانی بوج کوپگاں زُرتگ،
بے توار ءَ اُمرے شُت،
پہ ھمے امیت ءَ کہ
وھد بلکیں مٹیت ءُ زند بلکیں سازگ بیت،
نوکیں رَنگ سھرا بیت نوکیں دروشمے زاھر پہ مئے شاتکامے ءَ،
پہ اے راج ءِ باندات ءَ،
زندمان شگوست انچو ھچ بلے نہ دیست چماں،
ھر گورا ابیتکی اِنت تھنا گریوگ ءُ زاری،
سُتکگیں گدانانی بلُّکانی واھی آں بُنگرانیں دنیاھے،
پشکپانیں ھمراھے،
پہ اَبَد نی راھی آں
چوں کناں بہ ننداں کہ نندگ ءِ بدل جاک اِنت،
پہ منی نگاھاں اے درستیں شھر بے واک اِنت،
تئی دل ءَ وَ درست گُرک اَنت تھنا من یک روباھے،
جی منی دپ ءِ ھر گپ پہ ترا بدے زاھے،
چی کناں چوشیں زند ءِ بے ریائیں بستار ءَ،
چی کناں چوشیں ھلک ءُ میتگ ءَ ءُ بازار ءَ،
پہ اَبَد نی راھی باں تانکہ ساہ رَوت ءُ کئیت،
جی تُپنگ دیر اِنت کہ ساہ ءِ دامن ءَ بستگ،
بل منا اَزل گِپتگ راہ باتل ءُ ھَکّ ءِ،
شر دل ءَ بکن مُھکم کہ تو چاکر ءِ ٹَکّ ءِ،
من نیاں چوشیں بے دل چو کہ تو دل ءَ مارئے،
من نیاں چشینے ھو چو کہ تو منا چارئے،
من ھزار کردانی شون آ دلاں داتگ،
ھو ھزار واھُند ءِ راز اے دل ءَ داشتگ،
من وَ زندگی کُرتگ،
ھچ کسی نگاھانی اندر ءَ نہ نشتاں کہ زِند پدراھی دنت واھگاں پہ تاوان اِنت،
پرچیا کہ چیری ءَ کار دیمتر ءَ کنز اِیت،
ناں پہ شوک ءُ شان ءَ ءُ ناں پہ پیشدارگ اے راہ دیمتر ءَ جُنزیت،
تو بہ زانئے یا کہ نہ،
من ھوں پہ وتا دیر اِنت سنگرے کتگ جاڑیگ،
شر وتی دل ءَ جزماں باندا کئیت منی باریگ،
ھمسرانی ھمراھی،
دشمنانی بیگواھی،
زندگی ھمیش اِنت ءُ لوٹ ھم مئے یکین اِنت،
آجوئی بس آجوئی
آجوئی بس آئی-