میڈیکل نودربرانی پی ایم سی ءَ رجسٹر بوگ ءِ کار واکدار ءُ جانسلامتی انت – بلوچ ڈاکٹر فورم

بلوچ ڈاکٹر فورم ءِ بنجاھی جارکش ءَ سرکار تنکید ءِ نشانگ کُرتگ ءُ گْوشتگ کہ ماھے بیت کہ سَے میڈیکل کالج مکران، جھالاوان ءُ لورالائی میڈیکل کالجانی نودربر پی ایم سی ءِ نیمگ ءَ جارجنگ بیتگیں چکاس ءِ بگیری ءَ زھرشانی کنگ ءَ اَنت بلے جانسلامتی ءُ سرکار ءِ نیمگ ءَ چہ یکے پہ داد رسی ءَ ھم نہ اتکگ –

جارکش ءَ گْوشتگ کہ چونائی ءَ میڈیکل کالج یا نودربرانی پی ایم سی ءَ رجسٹریشن کنگ کالج ءِ واکدار ءُ جانسلامتی کار انت، ھمے ھاتر ءَ کالج ءِ واکدار ءُ سرکار پی ایم سی ءِ شرتاں پورہ بہ کن انت ءُ نودربراں پی ایم سی ءَ رجسٹر بہ کنائیں اَنت- یا پی ایم سی ءِ رولانی رِد ءَ ڈنڈ بہ دئینت، پہ ایشی ءَ نودربراں دگہ چکاس گرگ مہ بیت ءُ آھانی وانگ ھراب کنگ مہ بیت –

جارکش ءَ گْوشگ ات کہ سرکار ءِ نادلگوشی ءِ سْوب ءَ ماھے بیت کہ نودربر شال ءِ سارتی ءِ سر ءَ پریس کلب ءِ دیم ءَ زھرشانی گدان ءَ نشتگ اَنت بلے سرکار ءِ گوشاں مورے نہ وارت-

جارکش ءَ گڈسر ءَ وتی درشان ءِ تہ ءَ گْوشتگ کہ ما چہ ڈاکٹرانی کمیونٹی ءِ نیمگ ءَ چہ سرکار ءَ دزبندی کن ایں کہ چنچوک زوت بوت کنت جاندراھی تک ءِ نودربرانی جیڑھاں گیش ءُ گیوار بہ کنت تانکہ نودربر پہ ایمنی گوں وتی وانگ ءُ زانگ ءَ برجاہ داشت بہ کن اَنت-