عبدالرھمان کھیتران ءِ جیل ءَ کھول درکنگ بہ بیت

چہ کوھلو ءَ سیادی داروکیں داروکیں خان مھمد مری ءِ رد ءَ آئی ءِ کھول اُستانی وزیر عبدالرھمان کھیتران ءِ جیل ءَ بندیگ اَنت-

ھالانی رد ءَ مری ٹک ءَ بندوکیں خان مھمد ء نبی بخش گزینی مری جھمنند دکی ءَ اُستانی وزیر سی اینڈ ڈبلیو سردار عبدالرھمان کھیتران ءِ بندیگی ءَ وتی کھول ءِ یل کنگ ءِ لوٹ کتگ –

آئی ءَ گُشتگ کہ من یک گریب ءُ نیزگاریں مردمے آں کہ مھنت ءُ مزوری کن آں ھلالیں رسک ءِ شوھاز ءَ آں ءُ زھگ ءُ زالبولاں والیناں وتی دراھیں بیگواھیں برات ءِ شوھاز ءِ کمک ءَ من سردار عبدالرحمان کھیتران ءِ یک گارڈے دروشم ءَ کار ءَ لگ اِتگ آں، سال دوھزار ءُ چاردہ ءَ یک کیسے منی ڈیوٹی ءِ وھد ءَ پیش اتکگ ءُ من دزگیر بیتگ آں –

کوھلو ءِ جھنند ءِ رد ءَ سال دوھزار ءُ نوزدہ ءَ جیل ءَ چہ دراتکگ اَنت ءُ چریشی ءَ پد من وھدیکہ لوگ ءَ اتکگاں گڑا سرپد بیتگ آں سردار عبدالرھمان کھیتران ءِ کارندھاں منی لوگ ءِ سر ءَ بیڑ برتگ ھشت مردم چریشاں منی زال مسمات گران ناز، زھگ فرزانہ،، زھگ عبدالستار، عبدالغفار، مھمد عمران، مھمد نواز، عبدالمجید ءُ عبدالقادر آوار جنگ بیتگ اَنت ءُ اد ءَ داں منی لوگ ءِ ساز ءُ سامان ھم برگ بیتگ اَنت –

خان مھمد مری ءِ رد ءَ آئی ءِ کھول اُستانی وزیر ءَ ھاجی گوٹھ دمگ بارکھان ءَ وتی جیل ءَ بند کتگ اَنت اود ءَ نا آیاں زوراکیں ٹوئلٹس ءِ پھک کنگ بلکیں آیانی سر ءَ جنسی ءُ جسمانی لَٹ ءُ کُٹ ھم بیگ ءَ اَنت-

آئی ءَ گُشتگ کہ من دمگ ءَ وتی مردمانی یلو کنگ ءِ جھد کرتگ بلے من ءَ سردار عبدالرھمان کھیتران ءِ نیمگ ءَ بے کچیں بیھار ءُ ناوشیں گپانی دیمپانی کنگ کپتگ-

زانگ بہ بیت عبدلرھمان کھیتران انیگیں اُستانی وزیر سی ایھڈ ڈبلیو اِنت آئی ءِ سر ءَ سال دوھزار ءُ بیست وتی دمگ ءُ پرنٹ میڈیا ءَ بندوکیں یک اھوالکارے انور یان کھیتران ءِ کوش ءِ بھتام اِنت ھمے وڑ گوستگیں سال ءَ عبدالرھمان کھیتران ءِ زھگ تیرگواری ءَ زدگ بیتگ اَت-

شال ءَ آئی ءِ زھگ میجر طاھر ءُ پشتون تاجر زمین ءِ جیڑہ ءِ سر ءَ تیرگواری ءِ وئیل پیش اتکگ اَت ھمے وڑ اُستانی وزیر ءِ گاٹانی تیرگواری ءَ سَے تاجر بیران بیتگ اِت اَنت –

کوھلو ءِ جھمنند خان مھمد مری ءَ مزن واکداراں ھوار زمہ واراں دزبندی کتگ سردار عبدالرھمان کھیتران ءُ آئی ءِ ھمراھانی ھلاپ ءَ اے زلم ءِ بگیری ءَ توار چِست بہ کن اَنت منی زھگ ءُ کھول اے ناجائزیں زُلم ءُ زوراکیانی دستاں رکینگ بہ بنت دانکہ وتی پشکپتگیں زند ءَ وتی زھگ ءُ چکانی دیم ءَ گوازینت بہ کن آں –