بلوچی زیمر ءِ نوک باھندیں گشندہ عابد الاھی ءِ نوکتریں پیت بند” گلزمین ” ھمے ماہ ءَ بزاں پنچ جنوری ءَ ما روکیں کندیل یوٹیوب چینل ءَ شنگ ءُ تالان بوگی اِنت – عابد الاھی ءَ وتی نوکتریں نوار کہ آئی ءِ دومی نوار اِنت، نودربر رھشون ڈاکٹر مھرنگ بلوچ ءِ نام ءَ ندر کُتگ ءُ آئی ءَ وتی نوکتریں نوار ءَ آشوبی سوت ھم گوشتگ –
عابد الاھی ءَ وتی نوکتریں پیت بند ءِ درگت ءَ گوشتگ کہ منی دومی نوار (گلزمین) پنچ جنوری ءَ چہ روکیں کندیل یوٹیوب چینل ءَ شنگ ءُ تالان بیت منی دست بندی اِنت کہ گلیں راج منی اے نوار ءَ گوش بہ دار ایت ءُ ھرچ ردی یے کہ گند ایت بائدیں مارا شون بہ دنت دانکہ ما دیمتر ءَ وتی تہ ءَ گھتری آؤرت کُت بہ کن ایں ءُ مئے دلبڈی ءَ بہ کن اَنت دانکہ ما دیمتر ءَ پہ راج ءَ جوانیں سوت گُشت بہ کن اِنت –
عابد الاھی ءَ ٹی بی پی ءَ گوں گپ کنان ءَ گوشتگ کہ راج مارا گوش دار ایت مئے جزبگ گیشتر توانا بنت، مئے جھد گیشتر بیت، بایدیں مئے راج ھمک گشندہ ءُ ازمکار ءَ دلبڈی بہ دے اَنت تاں کہ آ چہ وتی جھد ءَ دلپروش مہ بنت –
ما چُشیں بازیں گشندہ دیستگ اَنت کہ آ ھمے سبب ءَ دلپروش بوتگ اَنت ءُ دیم ءَ نیتکگ اَنت کہ آیاں راج ءِ نیمگ ءَ چشیں دلبڈی نہ رس اتگ گیشتر ایر جنگ بوتگ اَنت پمیشکا منی اے یک جھدے کہ من ایشی ءَ دیم ءَ برگ ءُ وتی راج ءَ شریں ءُ جوانیں سوگات دیگ لوٹاں –
آئی ءَ گُشت کہ من ءَ چہ کسانی ءَ گشندھی ءُ شائری ءَ گوں ھب بیتگ شما گُشت کن اِت کہ ازمکاری چہ کسانی ءَ منی ھون ءَ ھوار بوتگ آ وھدی کہ من کسان بوتگ اَنت من نمیرانیں نور خان بیزنجو، عارف بلوچ، مسلم حمل، شاہ جان داؤدی نمیرانیں عبداللہ ثناء ءُ دگہ لھتے گُشندہ گوشداشتگ اَنت ءُ منی ھم دل ءَ بوتگ کہ من ھمیشانی پئیم ءَ سوت بگوشاں، ماں چار پنچ سنگت برے برے شتگیں کَلگ ءُ کوچگاں نشتگیں دیوان کتگ ءُ وت ما وت ءَ شئیر ءُ سوت گوشتگ –
نوک باھندیں گشندہ ءَ ٹی بی پی ءِ جُست کہ شمارا وتی پیت بندے دیم ءَ آرگ ءَ چونیں جیڑھانی دیمپانی کنگ کپتگ اَنت پرچہ کہ دنیگت بلوچاں چُشیں مھکمیں ءُ دلجمیں اکیڈمی ءُ کمک نیست اِنت ءِ پسو ءَ عابد الاھی ءَ گُوشتگ کہ اے منی دومی پیت بند اِنت ءُ مشکل ھر کار ءِ تہ ءَ ھست اِنت، چو کہ منی اولی نوار ءِ وھد ءَ من ءَ ھم باز جیڑھانی دیمپانی کنگ کپتگ بلے ھدا ءِ شگر اِنت ءُ سنگت ءُ دوستانی دلبڈیانی سبب ءَ من اے سکیانی دیمپانی کتگ ءُ دیما روان کتگ۔ من وتی اولی نوار ءِ تہ ءَ مزنیں شائرانی شئیر ھم گوشتگ اَنت چو کہ نمیرانیں سید ھاشمی ءُ مبارک کازی ،مجید آجز ءُ منظور بسمل من ءَ شریں وڑے ءَ راج ءَ دلبڈی داتگ ءُ جوانیں رنگے ءَ راج ءَ گوش داشتگ مئے دلبڈی کتگ، ما انگت اے لوٹ ءَ چہ راج ءَ کنیں کہ ھمے وڑ ءَ مئے دلبڈی ءَ بہ کن اَنت ءُ ما دیم ءَ روان جنزان بہ کنیں۔
آئی ءَ وتی دومی نوار ءِ شئیرانی درگت ءَ گُشت کہ من وتی دومی نوار ءِ شائرانی لڑ یک شریں وڑے ءَ ٹھینتگ ءُ نوکیں شائرانی شئیر گوشتگ اَنت ءُ چار آشوبی سوت ھم گوشتگ ءُ من اے نوار بانک ڈاکٹر مھرنگ بلوچ ءِ نام ءَ ندر کتگ کہ آئی ءِ راج ءِ درد واری ءُ راجکاری ءَ سانمند بوتگ انت – انشاءاللہ اے نوار پنچ جنوری ءَ چہ روکیں کندیل یوٹیوب چینل ءَ شنگ ءُ تالان بیت –
آئی ءَ گڈسر ءَ گُشت کہ چہ بلوچ راج ءَ گوں ھمے دست بندی اِنت روکیں کندیل چینل ءَ سبسکرائب ءُ لائک شئیر بہ کن اَنت شریں وڑے ءَ گوشدار ایت ءُ مئے چو پیسرگیں رنگ ءَ دلبڈی بہ کن اِت-
یوٹیوب لنک: