شال: بیگواھیں مردمانی یل کنائینگ ءِ باور بہ کنائین اِت – نصراللہ بلوچ ءَ صوبائی مشیر داخلہ ءُ گوستگیں سروزیر بلوچستان ءَ گند ءُ نند

بلوچستان ءِ زورانسری آوار جنی ءِ بگیری ءِ چست ءُ ایر کنوکیں گل وائس فار بلوچ مسنگ پرسنز ءِ چیئرمین نصراللہ بلوچ ءَ دوشمبے ءِ روچ ءَ بلوچستان ءِ بنجاھی شھر شال ءَ اُستانی مشیر داخلہ ضیاء لانگو ءُ گوستگیں سروزیر بلوچستان نواب اسلم رئیسانی ءَ گوں جتاجتا گند ءُ نند کتگ-

سربوتگیں ھالانی رِد ءَ صوبائی وزیر مشیر ضیاء لانگو ءَ گوں گند ءُ نند ءَ بیگواھیں مردمانی جیڑہ ءِ سر ءَ گپ ءُ رپ بوتگ مشیر داخلہ ءَ بیگواھیں مردمانی یل کنائینگ ءُ زورانسری آوار جنی ءِ گر ءُ دار ءَ وتی کرد ءَ پیلو بہ کنگ ءِ باور بہ کنائین اِت-

ضیاء لانگو ءَ گْوشتگ کہ بیگواھیں مردمانی جیڑہ ءِ سر ءَ سر وزیر بلوچستان ءَ ھوار ڈیھی ادارھانی سروکاں گوں گپ کن آں-

نصراللہ بلوچ ءَ اے اُمیت درشان کتگ صوبائی مشیر داخلہ میر ضیاء لانگو بیگواھیں مردمانی یل کنائینگ ءُ زورانسری آوار جنی ءِ گر ءُ دار ءَ وتی کرد ءَ پیلو بہ کن اَنت ءُ گمیگیں کھولانی زند ءَ پہ مدامی ازیت ءَ چہ در بہ کن اَنت-

ھمے وڑ نصراللہ بلوچ ءَ گوستگیں سروزیر بلوچستان ءُ بلوچستان اسمبلی ءِ باسک اسلم رئیسانی ءَ گوں گند ءُ نند کتگ-

گند ءُ نند ءَ بلوچستان ھائی کورٹ ءِ ھبدہ نومبر 2021 پرمان سر ءَ گپ بوتگ – پاس کنگ بوتگیں پرمان ءِ رِد ءَ صوبائی حکومت بیگواھیں مردمانی یل کنائینگ ءُ آیانی کھول ءِ سکّیانی دیمپانی ءِ درگت ءَ چہ پارلیمانی کمیٹی جوڑ بہ کن اَنت-

ھمے درگت ءَ وائس فار بلوچ مسنگ پرسنز ءِ چیئرمین نصراللہ بلوچ ءَ نواب اسلم رئیسانی ءَ گوں گند ءُ نند کتگ اسلم رئیسانی ءَ باور کنائنتگ کہ آ اے کمیٹی جیڑہ ءَ صوبائی اسمبلی ءِ آؤکیں دیوان ءَ چست کنت-

زانگ بہ بیت ھائی کورٹ شنگ کتگیں پرمان ءَ دو ماہ سرجم بوگ ءَ اِنت بلے تنی وھدے صوبائی ھکومت ءَ بیگواھیں مردمانی درگت ءَ پارلیمانی کمیٹی جوڑ نہ کتگ-