کیچ: زالبولاں بیگواھیں مردم ءِ یل نہ کنگ ءِ ھلاپ ءَ زھرشانی، سی پیک دگ بند

بلوچستان ءِ دمگ کیچ ءِ ھند تجابان ءَ زالبولاں زھرشانی کنان ءَ سی پیک دگ بند کرتگ، زھرشانی برجاہ، ھمے وڑ چہ تربت ءَ کمشنر گپ ءُ تران ءَ رھادگ بیتگ –

زھرشانی کنوکانی گوشگ اِنت ھما وھد ءَ داں مئے لوٹ منّگ نہ بنت زھرشانی ھمے وڑ ءَ برجاہ بیت اِنت ءُ سی پیک دگ ھردوکیں نیمگاں رپت ءُ آمد ءَ بند کنگ بیتگ –

زھرشانی کنوکانی گوشگ اِنت مئے مردم پوج ءَ دزگیر کرتگ ءُ انگت ءَ گار اِنت –

ورنا کدی بیگواہ کنگ بیتگ: بیست ءُ نُھ دسمبر ءَ ناگتی پوج ءِ نیمگ ءَ چادر ءُ چار دیواری پامال کنان ءَ ھیرونک ءِ دمگ ءَ بیڑ برتگ ءُ یک مردمے دزگیر کنگ ءَ پد بیگواہ کرتگ آئی ءِ پجار دولت ء ھسن ءِ نام ءَ زانگ بیتگ –

آ شپ ءُ سنگ آباد ءَ چی بیتگ: ھما شپ ءَ پوج ءَ سنگ آباد ءَ بیڑ برتگ ءُ زھگ ءُ زالبول لوگاں کش اِتگ ءُ ڈن ءَ سارتی ءِ سر ءَ اوشتارینتگ اَنت ءُ لوگانی مڈی دز اِتگ ءُ برتگ اَنت ءُ لوگانی دریگ پروشتگ اَنت –

یک ماھے ءِ وھد ءَ کیچ ءِ دمگ ءَ اے دومی وئیل اِنت اے رنگین:

گوستگیں ماہ ءِ بیست ءُ ھپت دسمبر ءَ پاکستانی پوج ءِ زوراکیانی ھلاپ ءَ کلاھو ءُ سرنکن ءَ مھلوک ءَ ترندیں زھرشانی کرتگ ءُ ایف سی ءِ بنجل ءِ دیم ءَ زھرشانی نندانک جتگ –

تمپ ءُ کلاھو ءُ سرنکن ءِ مھلوک بازیں کچے ءَ زھرشانی کنان ءَ ایف سی ءِ بنجل ءِ دیم ءَ نشتگ اَنت –

زھرشانی کنوکانی گوشگ اَت کہ پوج ءِ کارمند مئے لوگاں دور کنت ءُ مارا تنگ کنت ءُ مئے لوگانی مڈیاں بارت ءُ ھمے وھد ءَ پوج ءَ مئے شش زھگ آوار جتگ اَنت کہ آیانی درگت ءَ ھچ ھال نیست اِنت-

زھرشانی کنوکاں گوشتگ کہ مئے مردم یل کنگ بہ بنت اگاں تمپ ءُ تربت ءِ راہ بند کنگ بیت اِنت-

انتزامیہ ءِ نیمگ ءَ اے درگت ءَ دگہ ھچ ھال دیم ءَ نیتکگ اَنت کھول ءَ بھتام جتگ اَنت مئے مردم پوج ءَ گپتگ اَنت اشی ءِ لیکہ انگت دیم ءَ نیتکگ اَنت –