تربت : تجابان ءَ بیگواہ بیتگیں ورنایانی کھولاں ڈپٹی کمشنر ءِ کارگس ءِ دیم ءَ زھرشانی کتگ

بلوچستان ءِ دمگ کیچ ءَ پاکستانی پوج ءِ دست ءَ بیگواہ بوتگیں ورنایانی کھول ءَ ڈپٹی کمشنر آفس دیم ءَ زھرشانی کتگ-

سربوتگیں ھالانی رِد ءَ بلوچستان ءِ دمگ کیچ ءِ ھنکین تجابان ءَ چہ پاکستانی پوج ءِ دست ءَ بیگواہ بوتگیں کلاس شش ءُ ھپت ءِ نودربر دوستا ءُ اقبال ءِ کھول ءَ ڈپٹی کمشنر کیچ آفس دیم ءَ زھرشانی کتگ ءُ آیانی یل کنگ ءِ لوٹ کتگ-

وھدیکہ ڈی سی کیچ ءُ اے ڈی سی ءِ باوری ءَ پد آھاں وتی زھرشانی مھتل کتگ-

تجابان ءَ چہ سیادی داروکیں چُک ءُ زالبولاں مروچی ڈپٹی کمشنر کیچ آفس دیم ءَ زھرشانی کنان ءَ گوشتگ کہ گوستگیں شپ ءَ ساھت چار ءَ پاکستانی پوج ھدا مرزئیں بدل ءُ میران نامیں مردمے ءِ لوگاں پُترتگ ءُ آئی ءِ چُک دوستا ء ھدا مرزئیں بدل ءُ اقبال ء میران چست کتگ ءُ گوں وت برتگ اَنت –

آیاں گوشتگ مئے چُک کسان اَنت آ شش ءُ ھپتمی کلاس ءَ وانگ ءَ اَنت اے چی میار ءُ چی گناہ کُت کن اَنت-

آیاں گوشتگ کہ اگاں مئے چُک میاربار اَنت گُڑا آیاں آمیدگس ءَ بیار اَنت پیش بہ کن اَنت ءُ جرم ءَ پدر بہ کن اَنت ءُ اے مستری آمیدگس ءَ بدے اَنت آیانی درگت ءَ سزا ءَ ئے پیسلہ ءَ بہ کنت، کسی ءَ کانود ءِ بگیری ءَ شپ ءِ نیم ءَ لوگانی تہ ءَ پترگ ءُ بیگواہ کنگ کجام انساپ اِنت؟ اے ڈیھ ءِ راھبند ءُ کانودانی بگیری ءِ ھمراھی انسانی ھکانی ھم بگیری اِنت-

ڈپٹی کمشنر کیچ ءَ بیگواھیں ورنایانی کھولاں گوں دیوان کتگ سے روچ ءِ تہ ءَ یل کنگ ءِ باوری کنائینتگ چریشی ءَ پد زھرشانی مھتل کنگ بیتگ-