بلوچستان ءِ دمگ کیچ ءَ چہ پاکستانی لشکریاں دو مردم دزگیر کنگ ءَ پد ناشناسیں جاھاں بُرتگ اَنت۔
ھالانی ردءَ گوستگیں شپ ءَ لشکریاں کیچ ءِ ھنکین تجابان ءَ یک لوگ یے سر ءَ بیڑ بُرتگ ءُ دو مردم دزگیر کنگ ءَ پد بیگواہ کُتگ اَنت۔
بیگواہ بیتگیں دوھیں مردمانی پجار اقبال ء میران ءُ دوستا ء حاجی بدل ءِ ناماں بیتگ۔
زانگ بہ بیت گوستگیں لھتیں روچاں کیچ دمگ ءَ زورانسری بیگواھی ءِ وئیلانی تہءَ گیشی گندگ ءَ پیداک اِنت ھمے یک ءِ ھپتگے تہءَ نیم درزن ءِ کساس مردم تھنا کیچ دمگ ءَ چہ بیگواہ کنگ بیتگ اَنت۔
زورانسری بیگواھیانی بگیری ءَ گوستگیں روچاں مزنیں کساس جنین آدم ءُ زھگاں تمپ ءَ ایف سی کیمپ انگیراں کُتگ اَت ءُ زھرشانی کنان ءَ بیگواھیں مردمانی یل کنگ ءِ لوٹ کُتگ اَت۔