تربت: ایف سی ءِ چیک پوسٹ ءِ سر ءَ اُرش

بلوچستان ءِ دمگ کیچ ءِ بنجاھی شھر تربت ءَ شمبے ءِ شپ ءَ پاکستانی پوج ءِ یک چیک پوسٹے ءِ سر ءَ اُرش بیتگ –

دی بلوچستان پوسٹ پتر ھال ءَ سر بیتگیں ھالانی رد ءَ تربت ءِ دمگ جوسک ءَ آرت ءِ مل ءِ نزیک ءَ ایف سی ءِ چیک پوسٹ ءِ ناشناساں دزبمبے چگل داتگ –

اُرش ءَ پد ایف سی ءَ گنوکائی تیرگواری کرتگ ءُ چریشی ءِ آسر ءَ دمگ ءَ ترس ءُ بیم ودی بیتگ –

بنداتی ھالانی تہ ءَ جانی تاوانانی ھال نہ بیتگ اَنت نانکہ تنی وھدی گلے ءَ پہ وت ءَ اے اُرش زرتگ –

زانگ بہ بیت کیچ ءُ کش ءُ گوری دمگاں آجوئیں لوٹوکیں گل پُرکار اَنت ءُ پاکستانی پوج ءِ سر ءَ یکشل ءَ اُرش کنگ ءَ اَنت –

گوستگیں روچ ءَ تربت ءِ شھر ءَ نادرا کارگس ءِ دیم ءَ یک چیک پوسٹے ءِ سر ءَ دزبمب اُرشے بیتگ اَت ءُ دو کارندہ زدگ بیتگ اِت اَنت کہ اشی ءِ زمہ واری پرکاریں گل بلوچ لبریشن آرمی ءَ منّ اِتگ اَت-