کریمہ بلوچ ءَ بلوچ زالبول راجکاری ءِ تکاں جنزینتگ اَنت – شال ءَ مراگش

بلوچستان ءِ بنجاھی شھر شال ءَ بلوچ وومن فورم ءِ چیردستی ءَ بی ایس او آزاد ءِ گوستگیں چیئرپرسن کریمہ بلوچ ءِ اولی سال روچ ءِ درگت ءَ پریس کلب ءَ یک مراگشے برجم داشتگ –

شال پریس کلب ءَ برجم دارگ بیتگیں مراگش ءَ بلوچ ءُ پشتون رھشوناں ھوار جتاجتائیں پھناتاں بندوکیں مردماں بھر زرتگ –

مراگش ءَ تران کنان ءَ بلوچ دانشور دین مھمد بزدار ءَ گوشتگ کہ بلوچستان زیردست کنگ بیتگ ءُ آئی ءِ مڈیانی پُلگ بیگ ءَ اَنت – بلوچ ڈیھ ءِ یک بھرے زانگ نہ بیتگ اَنت ھمے واستا زیردستی ودی بیتگ –

آئی ءَ گُشتگ ھاکم تاکت وراں وتی پُلپھانچیانی بگیری ءَ توار ءِ برز کنگ ءَ تاکت ءِ کارمردی کرتگ ءُ یک ترسے ءِ جاور ودینتگ اَنت بلوچ جد ءُ جھد ءِ یک دگہ بانک کریمہ ءَ ترس ءِ جاور پروش داتگ اَنت، کریمہ بلوچ ءَ بلوچ زالبول سیاست ءِ نیمگ ءَ ترینتگ اَنت پرچا زالبول ءَ ابید جد ءُ جھد ناسرجم اِنت کریمہ بلوچ ءِ پت ءُ مات دروتی ءِ ستاشانی اَنت آیاں بلوچ راج ءَ را کریمہ ءِ وڑیں زھگے ودی کرتگ –

آیاں گشتگ کہ کریمہ بلوچ ءِ جد ءُ جھد ءُ دیمھونیانی بدولت ءَ سرزمین ءِ ھکے پیلو کرتگ، آئی ءِ مشن ءُ آئی ءِ منزل راجی ھکانی رھبند یا انساپ ءِ رسینگ بیتگ، آئی ءَ گُشتگ ھاکماں نوزدہ سد ءُ چِل ءُ ھشت ءَ بہ گر داں انیگ ءَ بلوچ ڈیھ ءَ را ھک نہ داتگ بلوچ ڈیھ ءَ پاکستان ھک دیگ ءَ تیار نہ اِنت، بلوچستان ءَ ھاکمی بنداتی روچ ءَ واجھانی لوٹانی پد ءَ بیتگ اَنت درسیں وھداں بس دو رند ءَ بلوچانی راستیں نمائندگ موہ دیگ بیتگ اَنت آ ھم ھردوکانی گیش سَے سال بیتگ اَنت –

آئی ءَ گُشتگ کہ اے دمگ ءَ دگہ مھلوک سرپد اَنت نوکیں گریٹ گیم بلوچ وتی پجار ءُ سرڈگار ءِ پھازداری ءَ کن اَنت –

مراگش ءَ تران کنان ءَ بلوچ نودربر رھشون ڈاکٹر مھرنگ بلوچ ءَ گوشتگ کہ بلوچ چاگرد ءَ سیاہ ءُ تھاریں شپانی وھد ءَ کریمہ بلوچ ءَ رژن گندگ ءَ اتکگ اشی ءِ واستا آئی ءَ گھگیری کنان کرتگ ءُ آئی ءِ گھگیری ءِ بنھشت ٹورنٹو ءِ کور ءَ ھلاس کنگ بیتگ بلے آئی ءِ توار ٹورنٹو ءَ بہ گر داں گوادر ءَ برز اِنت کریمہ یک کردے ایوک ءَ نہ اِنت آئی ءِ کرد جتاجتائیں پھناتاں گوں بندوک اِنت، آ یک باگی ءِ زالبولے بیتگ آئی ءَ سرزمین ءُ راجی پجار ءِ ھاتر ءَ جد ءُ جھد کرتگ ھاکم جیڑگ ءَ اَنت لَٹ ءُ کُٹ ءِ زور ءَ بلوچ جد ءُ جھد ءَ داراں بلے اے جد ءُ جھد ءِ واستا کریمہ ءَ زندگی بکش اِتگ –

آئی ءَ گُشتگ کہ دیمروئی ءِ واستا بازیں ادارہ کار کنگ ءَ اَنت بلے آیانی منشور ءِ تہ ءَ جد ءُ جھد ءَ بید ءِ زلبول ءَ زندگ نہ بیت، زالبول وتی کارست ءَ وت نبشتگ کنت دنیا ءِ ھمک پرد ءَ وتی کسہ وت نبشتگ کنگی اِنت ءُ آ وتی کسھاں دگہ کسے ءِ دستاں مہ نبشتگ کنگ ءَ مئیل ایت کریمہ یک ھنچیں جھدے ءِ بھر جوڑ بیتگ آئی ءِ بھر بیگ مردینانی چاگرد ءِ مردینانی وس ءَ نہ اِنت –

آئی ءَ گُشتگ کہ اے راج ءَ کریمہ ءِ جد ءُ جھد ءَ را سلام پیش کرتگ ءُ آئی ءَ مات ءِ درجہ دیگ بیتگ باگی یے مات نالائق ءُ نابود نا باگی راج ودی کن اَنت باگی ھچ راجاں سرگوز نہ کن اَنت، کریمہ بلوچ ءِ جد ءُ جھد ءَ نوکیں رجدپترے ءِ وشبھت ءِ ما کریمہ ءِ اھد ءَ زندگ اِنت اے پجار جنگ اِنت اے شھیداں دیم ءَ برتگ اے جنگ ھلاس نہ بیت، شھید مھراب ھان ءَ انگریزانی گون ءَ پجار ءِ ھاتر ءَ جنگ کرتگ ءُ کریمہ ءَ ھمے درچ داشتگ اَت کجام لبز کجام نزم کریمہ ءَ بیان کرت نہ کنت آشوبی مردم زندگی ءَ گوں مھر کن اَنت اے جد ءُ جھد ھم ھما زندگی ءِ واستا ءَ اِنت-

مراگش ءَ پروفیسر ڈاکٹر رھیم مھر ءَ کریمہ بلوچ ءَ را دروت ندر کرتگ ءُ گوشتگ بانک کریمہ بلوچ ایوک ءَ سیاسی لیڈرے نہ بیتگ بلکیں آ یک ھنچیں رھشونے ءِ ھواری ءَ یک آزمانکار ءُ کلم کارے بیتگ آئی ءَ وتی آزمانکانی تہ ءَ بلوچ ڈیھ ءِ درد نبشتگ کرتگ اَنت بلوچ ءِ بزگی بیان کرتگ بیگواھیں زھگانی درد ءُ تھاریں شپ بیان کرتگ اَنت ءُ ادبی تکاں ھروھد ءَ زندگ مان ایت –

پشتون تھپز مومنٹ ءِ رھشون پروفیسر ارمان لونی ءِ گوھار وڈانگہ لونی ءَ تران کنان ءَ گوشتگ انسانی ھکانی ءُ انسانی پجار ءِ واستا کریمہ بلوچ ءَ دیمھونی داتگ وتی راج ءِ نیمگ ءَ بلوچ سرڈگار ءِ زھگ ءَ سلام پیش کن آں پشتون ءُ بلوچ مھلوک وتی اے وڑیں پرزندانی کربانیانی ستاشانی ءَ کنت وتی شھیدانی سالروچ ءِ دارگ ءَ وتی راج ء زندگ دارگے جھد اِنت مئے شھیداں مئے واستا دیمھونی داتگ، ھاکم ءُ زالم ءُ زیردست بزگی ءِ یک درچے بناہ اِنت اشی ءِ سبب استھسال اِنت – پشتون ءُ بلوچاں ھوار زیردستیں راجانی میان ءَ راجی لوٹانی واستا بس ھمسنتی اِنت ھر زلم ءُ زوراک ءِ ھلاپ ءَ ھر زمانگ ءَ یک موسا ءِ ودی بیتگ زُلم ءُ زوراکیانی بگیری ءَ بلوچ ءُ پشتونانی جد ءُ جھد برجاہ اِنت مئے تہ ءَ ھم موسا ءِ وڑیں کارات ودی بیگ ءَ اَنت –

آئی ءَ گُشتگ ما ھمینکس رانگ پیش بہ داریں اے مھلوک مارا وت دوست نہ گوش ایت ھمے واستا مارا وتی نیمگ ءَ وتی جد ءُ جھد کنگی اِنت وتی بدبھتیانی یکیں راہ اِنت آ راجدوستی اِنت مارا راجدوستی ءِ سیاست ءِ دارگ ءَ ھر وڑیں پندل بیگ ءَ اَنت بلے مئے گڈی آسر راجی راجکاری اِنت –

بی ایس او ءِ بنجاھی جنرل سیکرٹری بلوچ ماما عظیم ءُ گوشتگ بلوچ پشکپتگیں چاگرد ءَ کریمہ ءِ وڑیں کارست ودی کنگ ابکھی گپے نہ اِنت پرچا چاگردی لڑاں سیاسی رنگ ءَ ھروھد ءَ مھکمی اِنت –

آئی ءَ گُشتگ کہ کالونیل ریاستاں بد ایک راجے ءِ برزی بیت اِنت آ دگہ دراھیں راج ایر دست بنت کریمہ بلوچ ءَ جاورانی ھیال گور بیتگ ترند تریں جاورانی دیمپانی یے کرتگ کریمہ ءَ بلوچ ھرچ سکی ءَ اوشتوک بیتگ آئی ءِ تہ ءَ لیڈر شپ ءِ دراھیں رپک مان بیتگ اَنت –

این ڈی پی ءِ بنجاھی رھشون رشید کریم بلوچ ءَ گوشتگ راجی لوٹانی ھاتر ءَ یکے دومی ءَ گوں ھمکوپگ بیگی اِنت بانک کریمہ ءُ بلوچ شھیدانی کسانوکیں لوٹ نہ بیتگ اَنت بلکیں راجی لوٹانی ھاتر ءَ دیمھونی اش داتگ آئی ءَ گشتگ راجی لوٹانی ھاتر ءَ مارا ھچ چک ءُ پد بیگی نہ اِنت نانکہ یکے دومی ءِ گٹ ءَ گرگی اِنت بلکیں یکجاہ بیگ ءُ راجی لوٹ سرجم کنگی اَنت –