کراچی ءَ بیگواھیں مردمانی ھاتر ءَ زھرشانی برجاہ

سندھی سیاسی باسک رستم شر ءِ زھگ ءُ آئی ءِ لوگ بانک ءِ زورانسری آوار جنی بے کساس پدری اِنت – ماما قدیر بلوچ

سندھ ءِ مزن شھر کراچی ءِ پریس کلب ءِ دیم ءَ زورانسری آوار جنگ بیتگیں سیاسی باسکانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ پنچ سد ءُ سِی ءُ دو روچ سرجم بیتگ –

ھمے وھد ءَ پشتون تھپز مومنٹ ءِ کور کمیٹی باسک خان مھمد شیر خان، وائس آف سندھ مسنگ پرسنز ءِ رھشون سارنگ رانی ءُ دگہ مردماں اتکگ ءُ یکجاھی درشان کرتگ –

وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گُشتگ کہ سندھی سیاسی باسک رستم شر ءِ کھول ءِ مردم کہ آیانی تہ ءَ لوگبانک، جنکو، زھگ نشار ءُ گوھار زتک ھوار کہ اَنت پاکستانی پوج ءُ چیریں اداھانی کارمنداں سندھ ءِ شھر پڈعیدن (نوشھروفیروز) دزگیر کنگ ءَ پد بیگواہ کرتگ اَنت اے یک پدردی ءِ ھالے ءُ ایرجنی اِنت –

ماما قدیر بلوچ ءَ گشتگ کہ دنیا بہ چار ایت کجام رنگ ءَ چیریں ادارھانی کارمنداں یک کسانیں شیرواریں تپلاں آوار جنگ ءُ بیگواہ کنگ ءَ اَنت ھا انگت دنیا بے توار اِنت یک شیر واریں زھگے کجام جرم ءَ ھوار بیت کنت، اے کجام کانون ءِ رھبنداں ھست اِنت کہ زالبول ءُ زھگاں آوار جنگ ءُ بیگواہ کنگ –

ماما قدیر بلوچ ءَ گُشتگ کہ سندھی، پشتون ءُ دگہ راجانی گون ءَ بیوکیں زلمانی ھلاپ ءَ بے توار نہ بہ ایں ما ھر تک ءَ زیردستانی گون ءَ اوشتوک اِنت زلمانی ھلاپ ءَ توار چست کن ایں –

آئی ءَ گُشتگ کہ مروچی ءِ روچ بلوچ راجدپتر ءَ ھروھدی ءَ یاتگیری ءَ کیت یک بلوچ چُکے کریمہ بلوچ کجام رنگ ءَ دراںڈیھ ءَ ھنر ءُ پندلانی گون ءَ کُشگ بیت بلے روچ ء مروچی ءَ داں آئی ءِ کشندہ گار اَنت آئی ءَ گُشتگ کہ کریمہ بلوچ بلوچستان ءِ یک زورامندیں توارے بیتگ کہ ھروھدی ءَ بے توار کنگ ءِ جھد بیتگ بلے شھید بیتگ نمیران بیتگ ءَ بلوچ راج ءِ دلانی تہ ءَ زندگ اِنت –