کریمہ بلوچ گھگیری ءِ چیدگ اِنت – تربت ءِ روانک ءَ تران کنوکانی تران

بلوچستان ءِ دمگ کیچ ءِ بنجاھی شھر تربت ءَ سَے شمبے ءِ روچ ءَ بلوچ اسٹوڈنٹس آرگنائزیشن آزاد ءِ گوستگیں چیئرمین کریمہ بلوچ ءِ اولی سالگشت ءِ درگت ءَ بلوچ یکجھتی کمیٹی کیچ ءِ نیمگ ءَ تربت پریس کلب ءَ روانک کشگ بیتگ –

روانک ءَ بھر زیروکیں مردمانی دستاں پلے کارڈز، بینرز ءُ کریمہ بلوچ ءِ اکس بیتگ اَنت جتا جتائیں دگاِ روانک تران بیتگ ءُ شھید پدا چوک ءَ زھرشانی اش کرتگ –

ھمے وھد ءَ تران کنوکاں تران کنان ءَ ادیب ءُ ہیومن رائٹس کمیشن آف پاکستان ءِ ٹاسک فورس مکران ءِ کوارڈینیٹر غنی پرواز، بلوچ اسٹوڈنٹس آرگنائزیشن ءِ بنجاھی کمیٹی ءِ باسک کریم شمبے، سھیلہ بلوچ، ھلیفہ برکت، سھتی بلوچ ءُ دگہ مردماں تران کنان ءَ گوشتگ کہ بانک کریمہ، بلوچ جد ءُ جھد ءِ چیدگ اِنت ءُ یک رژنائیں چراگے کہ پد منتگین ءُ نا امیتین مردماں راہ پیشداروک ءُ آیانی ھمت اِنت –

آیاں گوشتگ کہ ھما جد ءُ جھد کریمہ بلوچ ءَ بندات کرتگ مروچی آئی ءِ کاروان ءِ ھمسفر گیشتر بیتگ اَنت، بانک مروچی جد ءُ جھد ءِ چیدگ جوڑ بیتگ، بلوچ زالبول بانک کریمہ ءِ کرد ءَ ھوار بہ بنت –

تران کنوکاں تران کنان ءَ گوشتگ کہ کریمہ بلوچ ءَ بی ایس او ءِ کمان ھما وھد ءَ پھریز اِتگ کہ ھما وھد ءَ بی ایس او ءِ چیئرمین زاھد بلوچ بیگواہ کنگ بیتگ ءُ گل دو جاہ ءَ بھر بیگ ءَ بیتگ بلے اے باھمتیں رھشون ءَ گل پھازاتگ ءُ بی ایس او کلاسک ءِ رنگ ءَ جنزینتگ –

تران کنوکاں گوشتگ کہ وھدیکہ بانک کریمہ ءِ نام ءَ ارزی نبشتگ بیتگ گڑا آ گوشگ بیتگ تو برو چیر بہ بو بلے آئی ءَ ماتیں گلزمین ءِ گون ءَ اگا کنگ انکار کتگ –

آیاں گوشتگ کہ کولواہ ءَ بہ گر کیچ ءُ شال ءَ بہ گر داں کراچی ءَ جد ءُ جھد ءِ نکش جاڑیگ اَنت بلے بے دلیں دشمن آئی ءَ چہ ترس آماچ بیتگ ءُ درانڈیھ ءَ آ شھید کنگ بیتگ –

آیاں گوشتگ کہ اے ھما گھگیری ءِ چیدگی چار راہ اِنت چریشی ءَ ما مروچی بانک ءِ جد ءُ جھدانی ستاشانی ءَ کنگ ءُ آئی ءَ یات کنگ ءُ دنیا ءَ وتی گماں گوشگ ءَ اِنت ءُ آئی ءِ کوش ءَ وتی زھر ءِ درشان ءَ کنگ ءَ اِنت، بلوچ ھکانی واستا یک رندے پد ءَ یکجاہ بیتگ، فلسطین ءِ واستا لیلیٰ ھالد ءُ مئے واستا بانک کریمہ بلوچ ءِ دروشم جوڑ بیتگ اَنت ما ریاستی گلام اِنت ءُ گلاماں سرپد بیگ لوٹ ایت ھاکم مارا ھک نہ دنت مارا ھکانی واستا جد ءُ جھد کنگی اِنت آیاں چہ پچگرگی اِنت اے پھری ءُ مھری اَنت کہ مروچی بلوچ وتی جنکانی ناماں کریمہ بلوچ ءِ نام ءَ پر کنگ ءَ اَنت –