چندے دانک پہ مادر ء وتن شھید بانک کریمہ بلوچ ءَ – معراج لعل

نبشتانک: چندے دانک پہ مادر ء وتن شھید بانک کریمہ بلوچ ءَ

نبشتہ کار: معراج لعل

دی بلوچستان پوسٹ

زندگی اِنچو گِران نہ اِنت کہ من بہ گوشاں کہ گوازینگ نہ بیت بلے! اِنچو سُبک ءُ آسان ھم نہ اِنت کہ یکیں داب ءَ ءُ یک شلہ بروت۔ پرچہ کہ زندگی ایوک ءَ زندگ بوئگے نام نہ اِنت ءُ نہ کہ زندگ بوگ ءِ مُھتاج اِنت اسل زندگی ھما اِنت کہ مَرگ چہ پد ھم تو زندگ لیکگ بوت گُڑا بزاں تو زندگے۔

اے بنی آدمانی جنگل ءَ چُشیں بازیں درورے گِندگ کیئت کہ آ بے پائدگ ءَ زندگ اَنت اَنچو گُشت کنے کہ پہ وت ءَ زندگ اَنت یاکہ پہ وتی کُوریں زندگی ءِ زندگ کنگ ءِ ھاتر ءَ زندگ اَنت بلے چُشیں درور اد ءَ باز کم گندگ ءَ کیئت کہ آ پہ وتی دِرتہ پُچیں ،لگتمالیں ، ٹپ واریں راج ءِ ھاتر ءَ زندگ بہ بیت ءُ آوانی زندگ کنگ ءِ ھاتر ءَ زندگ بہ بیت، یاکہ آوانی پجار ءُ شُناس ءَ زندگ بدار ایت۔

ھمے بے بھایں ءُ بے دروریں راج دوستانی تہ ءَ یکے بانک کریمہ بلوچ بوتگ کہ آ پہ وت ءَ ناں بلکیں پہ وتی راج ءِ پیرزال، کماش، مزن، کسان پہ راج ءِ پاد شپادیں چُک چُک ءِ ھاتر ءَ زندگ بوتگ ءُ تنی وھدی زندگ اِنت۔ چُشیں راجی ہستیانی سَپر کنگ ءَ ماں زاول گُشت نہ کناں ، پرچہ کہ زاول ھما مردم بنت کہ آیانی کرد ءُ سوچ ءُ پکر زاوال بنت یا آیاں زاوالیں زندے گوازینتگ۔ بلے شہید بانک کریمہ بلوچ ءِ زُبان ءَ چہ در اَتکگیں یک یک لبزے یک کردے ءِ واھند بوتگ یک سُوچے ءِ سرکماشی یے کُتگ ءُ یک پکرے ءِ راہ شُناس بوتگ چُشیں رھبر دائمی زندگ بنت ءُ نمیران لیکگ بنت۔

شھید بانک کریمہ بلوچ بلوچستان ءِ زالبولاں چہ ابید دنیا ءِآدگہ زالبولانی واستا یک مزنیں درورے کہ آئی ءَ کُجام سَکیانی توک ءَ اے نگیگیں جاورانی دیپانی کُتگ ءُ گوں جوریں بدّاں دیم پہ دیم بوتگ ءُ وتی بُنکی حقانی واستا آواز چست کُتگ ھما آواز کہ روچ مروچی بلوچستان ءِ کُنڈ کُنڈ ءَ جسکگ ءَ اِنت ءُ بانک ءِ اَست بوئگے شُبین ءَ دائگءَ اِنت۔
منی قلم اِنچو تمرد نہ اِنت کہ بانکیں شہید کریمہ بلوچ ءِ سال ءُ سالانی راجی جُھد ءَ گوں چندے ٹپی ئیں لبزاں بیان بہ کنت بلے گُڈ سر ءَ اِنچو گُشاں داں جہان اَستیں شہید بانک کریمہ بلوچ ءِ بے دروریں نام گوں سوچ ءُ پکر ءَ زندگ بیت ءُ دائم نمیران بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔