منی برات اگاں مجرم انت آمیدگس ءَ آرگ بہ بیت – نئیما بلوچ

چہ کراچی ءَ زورانسری آوار جنگ ءُ بیگواہ بوتگیں بلوچستان ءِ جھمنندیں نودربر نسیم بلوچ ء ھاجی عبدالکریم ءِ گوھار نئیما بلوچ ءَ سند ءِ مزن شھر کراچی ءَ پریس کلب ءِ دیم ءَ برجاھیں وائس فار بلوچ مسنگ پرسنز ءِ بنجل ءَ اتکگ ءُ وتی زھرشانی نبشتہ کنائینتگ –

آئی ءَ وائس فار بلوچ مسنگ پرسنز ءِ بنجل ءَ وتی برات ءِ رپورٹ نبشتہ کنائینتگ ءُ گوشتگ کہ منی برات لاء کالج ءِ نودربرے آ چاردہ مئی سال دوھزار ءُ نوزدہ ءَ کراچی ءَ چست کنگ بوتگ آفتاب ھم آئی ءِ ھمراہ بوتگ – منی برات ءِ ھال ءَ ھانی ھم سرپد انت آفتاب ھم سرپد انت –

نئیما بلوچ وتی شنگ کرتگیں تامربندے ءِ تہ ءَ گوشتگ کہ مار ءَ گوں ھانی ءَ ھچ واستا نیست انت – منی برات ءِ واستا ھر وڑیں زھرشانی ءُ روانک بنت من وت ساڑیاں – آ ناکہ منی کھول ءِ مردم انت ءُ ناکہ منی برات ءِ دشتار انت –

آئی ءَ چہ پاکستانی سرکار ءَ لوٹ کتگ گوشتگ کہ منی برات ءَ ھر وڑیں کارے کُتگ اگاں آ کسوروار انت آمیدگس ءَ آرگ بہ بیت-