میان اُستمانی انسانی اگبالانی روچ ءِ درگت ءَ آدینگ ءِ روچ ءَ جرمنی ءِ شھر ھیگن ءَ ایمنسٹی انٹرنیشنل ھیگن گروپ ءِ چیر دستی ءَ یک مراگشے برجم دارگ بیتگ۔
اے پروگرام ءَ کولسنکووا، سوریا ءُ دگہ ڈیھانی پئیم ءَ بلوچستان ءَ سیاسی باسکانی جیڑھانی درگت ءَ ھیال درشان کنگ بیتگ اَنت۔
ایمنسٹی ءَ گُشتگ مارا پاکستان ءَ بلوچانی جیڑھانی سمائی ھست۔ آئی ءَ گُشتگ بلوچ راج پاکستان ءِ جنوب مگربی پرگینگ ءَ نشتگ اَنت ءُ آیانی وتی جتائیں دود ءُ ربیدگ اَنت۔
آئی ءَ گُشتگ کہ سیاسی باسک ءُ آیانی کھول پوج ءُ چیریں ادارھانی نیمگ ءَ مزنیں کساسے ءَ بیگواہ کنگ بنت، گیشتریں وھد ءَ لَٹ ءُ کُٹ کنگ بنت ءُ پد ءَ آیانی جون جنگل ءُ کوراں دور دیگ بنت۔
اے مراگش ءَ زورانسری بیگواھی ءِ آماچ راشد ھسین، بلوچ اسٹوڈنٹس آرگنائزیشن آزاد ءِ گوستگیں چیئرمین زاہد بلوچ ،ڈاکٹر دین محمد بلوچ ،شبیر بلوچ ،رمضان بلوچ، اسد بلوچ، زاکر مجید بلوچ ءُ دگرانی کیسانی درگت ءَ گچینی پمفلٹ ھم بھر کنگ بیتگ ءُ اے کیسانی درگت ءَ کار برجاہ دارگ ءِ پیسلہ کنان ءَ بلوچستان ءَ زورانسری بیگواھی ءِ آماچیں مردمانی درگیجگ ءِ لوٹ کنگ بیتگ اَنت۔