ھاران: کسان سالیں کفایت اللہ ءِ یل نہ کنگ ءِ ھلاپ زھرشانی روانک

بلوچستان ءِ دمگ ھاران ءِ جھمنندیں کسان سالیں کفایت اللہ بلوچ ءِ یل نہ کنگ ءِ ھلاپ ءَ زھرشانی روانکے کشگ بیتگ –

25 جولائی 2018 ءَ جنرل الیکشن ءِ وھد ءَ ھاران اولنگی پولنگ اسٹیشن ءَ لھتے مردمانی دست ءَ آوار جنگ بیتگیں کفایت اللہ بلوچ ءِ یل نہ کنگ ءِ ھلاپ ءَ سَے روچ ءَ زھرشانی بنجل ءَ پد شھر ءَ یک روانکے کشگ بیتگ –

روانک ءَ جت جتائیں سیاسی، نیکراھی پاٹی، سول سوسائٹی، زالبول ءُ چکاں بازیں کچے ءَ بھر زرتگ –

زھرشانی کنوکانی دستاں پلے کارڈز، بینرز ءُ کفایت اللہ ءِ اکس چست کنگ بیتگ ءُ زھرشانی کنوکاں کفایت اللہ ءِ یل کنگ ءِ لوٹ کرتگ –

ھمے وھد ءَ زھرشانی کنوکاں تران کنان ءَ گُشتگ کہ بدبھتی ءَ سَے سالاں چہ یک یازدہ سالی ئیں زھگے بیگواھی ءِ آماچ اِنت ءُ ادارھاں وتی دپ بستگ ءُ بس ندارہ چارگ ءَ اَنت –

آیاں گُشتگ یک یازدہ سالی ئیں زھگے ءِ آوار جنگ انسانی ھکانی بدتریں کمشرپی اِنت یک زھگے ءَ کسے ءَ چی دشمنی بیت کنت –

آیاں گُشتگ کہ کفایت اللہ دمگ ءِ میراں کہ آیاں سرکاری پلامرزی مھلوک ءَ ھمے واستا آوار جتگ کہ آئی ءِ کھول ءَ اے مرد ءَ ووٹ نداتگ –

آیاں گُشتگ کہ سرکاری مزنیں واکداریں ادارہ، سپریم کورٹ وئیل ءِ سر ءَ چار ءُ ٹپاس بہ کنت کفایت اللہ یل بہ کنت-

آیاں گُشتگ اگاں کفایت اللہ یل کنگ نہ بیت زھرشانی درچ گیش ودینگ بنت –

ھمے وھد ءَ کھول ءَ گُشتگ کہ انسان دوست مئے ھمراھداری ءِ توار ءَ برز بہ کن اَنت ءُ یازدہ سالی ئیں زھگ ءِ یل کنگ ءَ وتی کرد ءَ پیلو بہ کن اَنت –

کھول ءَ گُشتگ مئے زھگ ءِ یل کنائینگ ءَ مزن انساپ در گامگیج بہ زور اَنت-