بلوچستان ءَ انسانی ھکانی لگتمالی سنگینیں کچے ءَ سر بیتگ اَنت – بی وائی سی

بلوچ یکجھتی کمیٹی ءِ جارکش ءَ انسانی ھکانی میان استمانی روچ ءَ بلوچستان ءِ تہ ءَ انسانی ھکانی لگتمالی ءِ درگت ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچستان ءِ تہ ءَ انسانی ھکانی لگتمالی سنگینیں کچے ءَ سر بیتگ اَنت، بلوچستان ءَ برجاھیں انسانی ھکانی لگتمالی ءِ بگیری ءَ آمیدگساں وتی کرد پیلو کنگی انت –

گوادر ، اسلامآباد ءُ کراچی ءَ بوتگیں مراگشاں چہ اندازگ جنگ بیت اِنت کہ سرجمیں بلوچستان زھرشانی کنگ انت بلوچستان ءِ تہ ءَ بؤکیں انسانی ھکانی لگتمالی ءِ بگیری ءَ آمیدگساں وتی ھاموشی ھلاس کنگی انت پاکستان ءِ کانود ءِ سزا ءِ پیسلھانی سر ءَ امل کنگی انت – بلوچستان ءِ تہ ءَ برجاھیں انسانی ھکانی لگتمالی پاکستان ءِ وتی کانود ءُ رھبندانی بگیری دارگ انت اگاں اے درچ ھمے وڑ برجاہ بوت گڑا دیمتر ءَ جاور ھال گیشگیواری ءَ چہ ڈن بنت – مھلوک بازیں اڑ ءُ جنجالانی دیمپانی ءَ کنگ ءَ انت، آپ ھاتر ءَ ھم نوں ھزارانی کچ ءَ مھلوک دگانی سر ءَ درآیگ ءَ لاچار بوتگ – گوادر ءِ تہ ءَ مروچی ھزارانی کچ ءَ مردم وتی ازت ءُ بنکی ھکانی واست ءَ دراتکگ اَنت بلے آمیدگس ءُ ریاستی زمہ داریں ادارھاں بلوچستان نزرانداز کتگ –

جارکش ءَ گوشتگ گوستگیں دو دھکاں بلوچستان ءِ انسانی ھکانی سک باز لگتمالی بوگ ءَ انت، زورانسری آوار جنی، کُشت ءُ کوش، نودربرانی زرانسری آورجنی ءُ کوش، مردمانی روزگار ءِ تباھی ءَ ھوار بلوچستان ءِ مردمانی لُٹ ءُ پُل برجاہ انت بلے استان ءِ ھچ وڑیں ادارہ بلوچستان ءِ جیڑھانی گیش ءُ گیواری ءِ وڑ ءَ نہ انت کہ یک بلاھیں المیہ ئِے –

بلوچستان ءَ برجاھیں انسانی ھکانی لگتمالی ءَ پاکستان ءِ رسانکدر، مین اسٹریم سیاسی پاٹی، آمیدگساں ھوار انسانی ھکانی ادارہ ھم ھچ گوشگ ءَ نہ انت – بلوچستان ءِ کُنڈ کُنڈ مھلوک زوراکی ءِ دیمپانی ءَ کنگ ءَ انت بلے ھچ وڑیں ریاستی ادارہ بلوچستان ءَ انسانی ھکانی لگتمالی ءِ سر ءَ گپ جنگ ءَ نہ انت ءُ آھانی دارگ ءِ ھچ وڑیں گامگیج زورگ گندگ بوگ ءَ نہ انت – ریاستی ادارھانی اولی زمہ واری ھمیش انت کہ مھلوک ءِ ھکانی پھریز ءَ بہ کن انت بلے مھلوک ھکانی پھریزگ ءَ ابید درسیں ادارھانی رویش بلوچستان ءِ درگت ءَ ھراب انت کہ آئی ردعمل مروچی مار ءَ سرجمیں بلوچستان ءِ تہ ءَ گندگ آھگ انت –

جارکش ءَ گوشتگ کہ یک نیمگے سرجمیں بلوچستان ءَ انسانی ھکانی روچ دارگ بوگ ءَ انت وھدیکہ دومی نیمگ ءَ بلوچستان ءَ انسان وتی ھکانی ھاتر ءَ زھرشانی کنگ انت بلے اھانی ھکانی پھریز ءَ ابید درسیں ادارہ بلوچستان ءِ تہ ءَ انسانی ھکانی بگیری ءَ یکے چہ دومی ءَ دیما انت – مزن آمیدگسانی زمہ واری انت کہ بلوچستان ءَ بؤکیں اے زوراکیانی بگیری ءَ وتی اولی زمہ داری ءَ پیلو بہ کنت –

جارکش ءَ گوشتگ مالی ھکاں بگر تاں زندگ بوگ ءِ ھک ھم پچگرگ بوتگ مھلوک ریاست ءَ چہ زندگ بوگ ءِ ھاتر ءَ زھرشانی انت بلے آھانی ھکانی دیگ وتی جاھاں گیشتر آھانی توار ءَ چیرترینگ ءِ کوشست انت کہ آئی ءِ پدریں درور کماشیں بلوچ رھشون یوسف مستی خان دزگیری انت – اقتدار ءَ نشتگیں ھاکم ءُ آمیدگسانی زمہ داری انت کہ آ بلوچستان ءِ تہ ءَ سیکورٹی پوج ءِ دست ءَ بوتگیں انسانی ھکانی لگتمالیانی دارگ ءِ ھاتر ءَ وتی بنکی کرد ءَ پیلو بہ کن انت –