کراچی ءَ وی بی ایم پی ءِ زھرشانی برجاہ

سندھ ءِ مزن شھر کراچی ءَ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ زھرشانی ءَ سرجمی ءَ چار ھزار ءُ پنچ سد ءُ بیست روچ سرجم بوتگ – این ڈی پی ءِ کنوینئر شاہ زیب بلوچ ءَ وتی کابینہ ءَ ھوار بلوچ یکجھتی کمیٹی ءِ آرگنائزرآمنہ بلوچ ڈپٹی آرگنائزر عبدالوھاب بلوچ ءَ اتکگ ءُ دلپدردی درشانتگ – ھمے وھد ءَ وی بی ایم پی ءِ سرکماش نصراللہ بلوچ ھم ساڑی بوتگ وھدیکہ بیگواھیں عبدالحمید ءِ کھول ءَ بنجل ءَ اتکگ ءُ وتی زھرشانی نبشتہ کنائینتگ –

ھمے وھد ءَ وی بی ایم پی ءِ سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ راج ریاستی ناشرکاری ءُ بلوچ راج دردناکیں کوش ءُ شھیدی ءَ پہ دردی درشانیں ءُ ایرجنیں کہ چیریں ادارھاں درسیں انسانی اخلاق لگتمال کتگ ءُ بلوچ پرزند شھید کتگ انت اولسر ءَ پنجاپ، کراچی، بلوچستان ءُ پشتون دمگاں شھید کتگ ءُ زانگولیں جون چگل داتگ انت بلے نوں پالیسی بدل کتگ انت بیگواھیں مردماں ھمساھگیں ملک ایران سیمسراں چِل کلومیٹر ءَ تہ ءَ بر انت شھید کن انت کہ گوستگیں روچ ءَ پنچ مردم شھید کنگ بوتگ انت کہ درسیں گواہ مئے گور ءَ ھست انت –

آئی ءَ دیمتر گوشتگ زوراکیں ریاست ءَ اے پدر کتگ اے رسترانی گور ءَ ھون وارگے ابید دگہ ھچ وطیرہ نیست، زورگیریں ریاست ءَ نوں پد ءَ وتی کار تیز کتگ انت گوستگیں بازیں روچاں بلوچ ورنایانی زورانسری آوار جنی ءُ آھانی زانگولیں جون دور دیگ ءِ درچ برجاہ انت آھانی اے کاراں چہ پدر انت اشانی تہ ءَ سیاسی دیمپانی ھمت نیست – مزلومیں بلوچانی شھید کنگ ءَ ترس ءِ ودّینگ انت وتی مولان سرجم کنگ لوٹیت بلے آ ایشی ءَ چہ بے ھیال انت اے وڑیں کاراں بلوچ ترس ءِ آماچ نہ بیت اِنت – آئی ءَ دیمتر ءَ پاکستان ءِ نام نھادیں انسانی ھکانی گل ءُ سیاسی پاٹیانی کرد ءِ سر ءَ نگد کتگ گوشتگ کہ گوستانک ءُ ھستیں وھد ءَ آ زاھر کتگ انت ءُ آھانی اے کرد ءَ ھچبر پھل نہ کنت –

دومی نیمگ ءَ کراچی ءَ چہ زورانسری آوار جنگ بوتگیں عبدالحمید زھری ءِ لوگبانک ءُ چُک ءَ زھرشانی بنجل ءَ اتکگ ءُ وتی زھرشانی نبشتہ کنائینتگ ءُ وی بی ایم پی بنجل ءَ آئی ءِ آوار جنی رپورٹ نبشتہ کنائینتگ – اے درگت ءَ راشد حسین ءِ گھار فریدہ بلوچ ءَ چاگردی ترامجاہ ٹوئیٹر تہ ءَ نبشتہ کتگ ما راشد حسین بلوچ ءِ زورانسری آوار جنی ءِ بگیری ءَ زھرشانی انت کہ پوج ءُ چیریں ادارھانی کارمنداں دہ اپریل دوھزار بیست ءُ یک ءَ زامات عبدالحمید زھری ءِ لوگ ءَ بیڑ برتگ بید ارزی ءَ گون وت برتگ، کھول ءَ درسیں کانودی راہ آزمائینتگ انت بلے عبدالحمید یل کنگ نبوتگ –

فریدہ بلوچ ءَ دیمتر ءَ گوشتگ کہ ایشی ءَ پیش ھم مئے گِسانی سر ءَ بیڑ برگ بوتگ ءُ آوار جنگ بوتگ انت، سی ٹی ڈی ءَ منی مات ءِ سر ءَ زور داتگ کہ راشد حسین ءِ کیس ءَ واپس بہ زوریت مار ءَ ھک دیگ ءِ بدل ءَ وڑ وڑ ءَ یکجاھیں سزا دیگ بوگ ءَ انت –