عبدالحمید زھری ھپت ماہ ءَ پیسر پوجی کارمنداں چہ لوگ ءَ آوار جتگ – لوگ بانک

چکانی پت دمگی پولیس ءُ چیریں ادارھاں مئے چمانی دیم ءَ آوار جتگ ءُ گوں وت برتگ، اے گپانی درشانی عبدالحمید زھری ءِ لوگ بانک ءُ چکاں کراچی پریس کلب ءِ دیم ءَ برجاھیں وائس فار بلوچ مسنگ پرسنز ءِ بنجل ءَ کتگ اَنت ءُ آئی ءَ بیگواھیں عبدالحمید ءِ بیگواھی ءِ درگت ءَ سرپدی وی بی پی ایم ءِ گور ءَ نبشتہ کنائینتگ اَنت –

چہ کراچی ءَ زورانسری آوار کنگ بیتگیں ھزدار ءِ ھند زھری ءِ جھمنند عبدالحمید زھری کھول ءِ رد ءَ ھمے سال ءِ دَہ اپریل ءَ دمگی پولیس ءُ لس پوشاکی کارمنداں کراچی ءَ آیانی لوگ ءِ سر ءَ شپ ءَ بیڑ برتگ ءُ اود ءَ جاڑیگیں عبدالحمید زھری ء شکر خان گوں وت برتگ –

لوگ بانک بیگواھیں عبدلحمید زھری ءِ رد ءَ وئیل ءَ پد ما دمگی پولیس ءُ دگہ ادارھانی گور ءَ شتگ اِنت کہ ابید ءِ ارزی نامہ ءَ شما اتکگ ءُ لوگ ءِ سر ءَ بیڑ برتگ ءُ عبدلحمید زھری دزگیر کرتگ ءُ گوں وت برتگ گڑا آیاں اے گپ رد کرتگ –

عبدالحمید زھری ءِ لوگ بانک ءِ رد ءَ ما مروچی بیگواھیں مردمانی بنجل ءَ ھمے واستا اتکگ اِنت کہ مئے توار ءَ دگہ ادارھاں داں سر کرت بہ کن اَنت ءُ بیگواھیں عبدالحمید زھری ءَ دیم ءَ بیار اَنت ءُ انساپ بہ دے اَنت-

کھول ءَ وائس فار بلوچ مسنگ پرسنز ءَ بیگواھیں عبدالحمید زھری ءِ زورانسری آوارجنی ءِ بارو ءَ سرپدی داتگ اَنت ءُ کھول ءِ گوشگ اِنت زوتاں وئیل ءِ بارو ءَ گیشیں سرپدیانی بارو ءَ پریس کانفرنس کن ایں –