پاکستان ءِ قومی سلامتی ءِ مشیر معید یوسف ءَ بی بی سی ءِ پرواگرم ھارڈ ٹاک ءَ گپ کنان ءَ گشتگ پاکستان ءَ چین ءَ پوجی اڈہ نہ داتگ، بلکیں اے باپاری (اکنامک) بیسز اَنت۔ ما ھمے باپار ءِ ھاتر ءَ امریکہ، روس ءُ مشرق وسطی ملکاں ھم گُشتگ، اگاں آ اِدءَ سرمایاداری کنگ لوٹ انت۔
معید یوسف ءَ گُشتگ کہ مئے مُلک ءِ لیکہ ءِ تہ ءَ نی داں باز ھد ءَ بدلی اتکگ ما نی جیو سٹریجیک ءِ جاہ ءَ جیو اکنامک لوٹانی سر ءَ کاربند اِنت، کہ اِشی ءِ ھاتر ءَ گپ تران ءُ دیمروئی پراجیکٹسانی تہ ءَ یکجاھی المی اِنت۔
آئی ءَ امریکہ ءِ گلگ دیان ءَ گُشتگ کہ ما مدام گوں امریکہ ءَ جوانیں ءُ یکجاھیں جاور لوٹیں، بلے مدام وھدیکہ امریکہ ءِ لوٹ سرجم بنت گُڑ ءَ پاکستان یک نیمگے ءَ کنگ بیت اِنت۔
معید یوسف ءَ گُشتگ مئے ملک مگرب ءِ لیکہ ءَ نہ من ایت سنکیانگ ءِ درگت ءَ، اگاں چین وتی مُلک ءَ امریکہ ءِ رد ءَ زوراکی کنگ ءَ اِنت گُڑا آ وت مزنیں ملک اَنت بائد اِنت گوں چین ءَ دیم پہ دیم گپ بہ کن اَنت۔
بیگواھیں مردمانی جُست ءِ درگت ءَ معید یوسف مدامی وڑ ءَ گپ تاب دیان ءَ گُشتگ کہ بازیں بیگواھیں مردم ناشرکار اگاں جرمکار بیتگ اَنت ءُ بازیں جنگاں شُتگ اَنت کہ ھمود ءَ جنگ بیتگ اَنت۔ پروگرام ءِ مھماندار ءَ معید یوسف ءَ گُشتگ میان اُستمانی گلانی رپورٹزاں ابید ھم زاناں آ اے انسانی اگبالانی ترندیں لگتمالیاں نہ من اِیت؟
آئی ءَ گُشتگ کہ ما اے لبر ترندیں لگتمالی ءَ نہ من آں۔ آئی ءَ گُشتگ کہ اگاں مارا چُشیں کیس ءِ ھم دزکپ ایت کہ اود ءَ ریاست ءَ انچیں کارے کُتگ کہ کنگی نہ بیتگ گُڑا آ مردم ءِ ھلاپ ءَ گامگیج زیرگ بیت اِنت ءُ سزا دیگ بیت انچش کہ یک زمہ واریں ڈیھے کنت۔
دومی نیمگ ءَ ھیومن رائٹس کاؤنسل آف بلوچستان ءِ جارکش عبداللہ عباس ءَ معید یوسف ءِ بی بی سی ءَ گوں گلگدار ءِ سر ءَ وتی شنگ کُتگیں ٹوئیٹے ءِ تہ ءَ گُشتگ کہ چہ معید یوسف مردم دگہ چی امیت کُت کنت۔
آئی ءَ دیمترا گُشتگ بلوچستان ءِتہ ءَ پاکستانی پوج ءِ زوراکیاں کس چیر دات نہ کنت۔ زیکیں روچ ءَ پوج ءَ سَے بیگواھیں مردم تیر جتگ اَنت کہ چریشاں دو مردم بیران بیتگ ءُ یکے ٹپی اِنت۔ ھر سئیں مردم چہ بازیں سالاں پوج ءِ دزگیری ءَ بیتگ اَنت۔
زانگ بہ بیت بلوچستان ءَ بیگواھیانی درچ بازیں وھداں برجاہ اَنت ءُ بلوچستان ءَ سیاسی مردمانی بھتام اِنت کہ اد ءَ مردمانی بیگواہ کنگ ءَ پاکستان ءِ پوج ءُ چیریں ادارہ ھوار اَنت –
بلوچستان ءَ گار ءُ بیگواھیں مردمانی کھول بلوچستان ءَ ھوار پاکستان ءِ دگہ جاھاں ھم یکشل ءَ زھرشانی کنگ ءَ اَنت –