خاران: کسان سالیں کفایت اللہ ءِ یل نہ کنگ ءِ ھلاپ ءَ زھرشانی

بلوچستان ءِ دمگ خاران ءِ جھمنندیں کسان سالیں کفایت اللہ ءِ کھول ءَ پشمبے ءِ روچ ءَ خاران ءَ یک زھرشانی روانکے کش اِتگ –

زھرشانی روانک ءَ سیاسی پاٹی، نودربر گلانی رھشون ءُ شھریاں ھوار ھوار زالبول ءُ چک ھم ھوار بیتگ اَنت –

کھول ءِ گوشگ اِنت کفایت اللہ دوھزار ءُ ھژدہ ءِ الیکشن ءِ روچ ءَ لھتے مردماں آوار جتگ کہ آیاں سرکار ءِ چیردستی گون اِنت –

آیانء رد ءَ دوھزار ءُ ھژدہ ءِ الیکشن ءَ اوشتوکیں مردم ءَ ووٹ ءِ نہ دیگ ءَ سزا مئے زھگ ءَ دیگ بیگ ءَ اَنت –

کھول ءَ پاکستان ءِ سرکار، سپریم کورٹ ءُ ملکی ادارھاں گوں کسان سالیں کفایت اللہ ءِ سلامتی ءَ یل کنگ ءِ دزبندی کتگ –

آیاں گُشتگ کہ یک یازدہ سالی ئیں زھگے ءِ آوار جنوک داں انگت ءَ انساپ ءِ سر ءَ آرگ نہ بیتگ اَنت-

ھمے وھد ءَ زھرشانی کنوکاں تران کنان ءَ گوشتگ کہ یک یازدہ سالی ئیں زھگے ءِ آوار جنگ شرمناک اِنت ءُ کھول گوستگیں سَے سالاں انساپ ءِ ودار ءَ اَنت –

آیاں گوشتگ کہ اے سنگینیں جرم ءَ دراھیں انسانی ھکانی ادارہ ءُ سیاسی پاٹی توار چست بہ کن اَنت ءُ کھول ءَ انساپ بہ دے اَنت –

کھول ءِ رد ءَ خاران ءَ سَے روچی زھرشانی بنجلے ءَ پد اگاں مارا انساپ نہ رس اِت گڑا زھرشانی بنجل ءَ بلوچستان ءِ بنجاھی شھر شال ءَ برجم داریں –