بلوچ نیشنل موؤمنٹ (بی این ایم) ءِ بنجاھی جارکش ءَ گْوشتگ کہ پاکستان ءُ آئی ءِ لشکر بلوچستان ءَ چکچینی ءِ نوکیں تْرامے چکاسگ ءَ اَنت۔تچکی ءَ نشانگ کنگ ءُ کُشگ،آزارجاھاں آزاردیگ ءُ کُشگ،ژانگولیں لاشانی چگل دیگ گْوستگیں دو دھکاں برجاہ بیتگ کہ اے سال ءَ سی ٹی ڈی ءِ دست ءَ کلپیں میڑ ءِ گیشی کنگ بیتگ۔لشکر ءَ بندیگیں مردم کُشتگ ءُ سی ٹی ڈی ءِ گون ءَ دیم پہ دیمی ءِ نام دات بلے زوت راستی ءِ دیم ءَ آیگ بندات بوت چے ءَ کہ زورانسری بیگواھیں مردمانی کھول ءُ جتائیں گلانی نیمگ ءَ یاداشت کُرتیں چیز منانک ءِ دروشُم ءَ ھست اِت اَنت۔ اے زوراکی سرجم ءَ پدر بوت کہ پاکستانی لشکر بندیگیں مردماں کُشگ ءَ اِنت۔ اے دْرچ برجاہ اَت کہ لشکر ءَ دگہ یک نوکیں دْرچے بندات کُرتگ ءُ بندیگیں مردماں چہ وتی زورگیپتیں ھاک ءَ دَر دگہ ڈیھے ءَ بارت ءُ کُش ایت۔
بی این ایم ءِ جارکش ءَ گْوشتگ کہ گْوستگیں روچ ءَ مند ءَ بندوکیں ایران ءِ چیردستیں روکپتی بلوچستان ءِ ھُنگ ءَ پاکستانی لشکر ءَسَے بندیگیں مردم تیرجتگ ءُ کُشتگ اَنت ءِ شُتگ بلے چہ ایشاں یک مردمے کُدرتی رَک اِتگ۔ سرجمیں بلوچستان ءَ پاکستانی لشکر ءَ منشیات ءِ باپاری ءُ میارباریں مردمانی کُشندہ ٹولی جوڑ کُرتگ کہ آیاں( ڈیتھ سکواڈ)گْوش اَنت۔گمان ھمیش اِنت کہ اے بندیگیں مردم پاکستانی لشکر ءَ ھمے کُشندہ ٹولی ءِ دست ءَ روکپتی بلوچستان ءِ ھاک ءَ آورتگ ءُ کُشتگ اَنت۔چے ءَ کہ گْوستگیں چیزے سال بیت کہ پاکستانی لشکر ڈَنڈور کنگ ءَ اِنت کہ پاکستانی لشکر ءِ دست ءَ زورانسری بیگواھیں مردم بند نہ اَنت بلکیں چہ ڈیھ ءَ دَر یا کوہ ءَ شُتگ ءُ پاکستان ءِ بگیری ءَ جنگ کنگ ءَ اَنت۔وتی ھمے گپ ءِ راست کنگ ءَ یک نیمگے سی ٹی ڈی ءِ نام ءَ بیگواھیں مردماں کُشگ ءُ لاشاں چگل دیگ ءَ اِنت ءُ نی چہ ڈیھ ءَ ڈَن ءِ ٹاپار ءِ راست کنگ ءَ پاکستان ءَ میان استمان ءِ سیمسری راھبند ءِ بگیری کُرت ءُ سَے بندیگیں بلوچ ایرانی سیمسر ءَ سی چِل کلومیٹر روکپتی بلوچستان ءِ ھاک ءَ آورتگ ءُ شھید کُرتگ اَنت بلے چہ ایشی ءَ پاکستان وتی جنگی میارباریاں چیردات نہ کنت بلکیں ھمساھگیں ڈیھ ءَ ھوار سرجمیں جھان ءِ دیم ءَ پاکستان ءِ بدیں چھرگ پدر بیت۔
آئی ءَگْوشتگ کہ چہ روکپتی بلوچستان ءَ کہ ھمکے بندیگیں مردم تیرجنگ بیتگ اَنت ایشانی تہ ءَ یکے اسد ء ناسر جھمنند نوکیں کھن مند، یک جولائی 2019 ءَ چہ گس ءَ دزگیر کنگ ءَ پد بیگواہ کنگ بیتگ۔شھید اسد ءِ کستریں برات یاسر 14 اکتوبر 2010 ءَ زورانسری بیگواہ کنگ ءَ پد 8 مارچ 2011 ءَ شھید کنگ ءُ لاش جنگل ءَ چگل دیگ بیتگ اَت۔شھید اسد ءُ ٹپی بیتگیں ھان مھمد شاھوانی ءِ زورانسری بیگواھی ءِ بگیری ءَ رسانکدر ءَ کمپئین برجم دارگ بیتگ یاداشت ءَ آئی ءِ زھگانی دزبندی پہ منانک ءَ انگت ھست اِنت کہ آ پاکستانی آزارجاھاں بند بیتگ۔ بیگواہ کنگ ءَ پد ءُ اے ایشانی اکس بیگواھی مردمانی گدان ءَ جنوک بیتگ اَنت۔
آئی ءَ گْوشتگ کہ ھان مھمد ء جُماھان شاھوانی 17 جون 2019 ءَ چہ ھُزدار زھری ءَ لیویز ءَ دزگیرکنگ ءَ پد پاکستانی لشکر ءِ دست ءَ داتگ۔زندگ ءَ رَک اِتگیں ھان مھمدشاھوانی ءِ دزگیر کنگ ءُ برگ ءِ چم دیست انگت ھست اَنتکہ دزگیرکنگ ءِ وھد ءَ ھان مھمد شاھوانی ءَ گْوشتگ کہ اگاں من ءَ لشکر ءِ دست ءَ دیگ بوت گڑا آ من ءَ بیگواہ کنت یا کُش ایت بلے لیویز ءَ پاکستان ءِ وپاداری ءِ ھک پیلو کنگ ءَ ھان مھمد لشکر ءِ دست ءَ دات۔
جارکش ءَ چہ جھان ءَ دزبندی کُرتگ کہ آ ھام مھمد شاھوانی ءِ زندگی ءِ رکینگ ءُ گپانی گوشدارگ ءَ بلوچ راج ءِ کمک ءَ بہ کنت۔مارا گمان اِنت کہ پاکستان ایشی ءَ ھم چو شھید ناسر ڈگارزھی ءِ وڑ ءَ یکبرے پد ءَ آوارجنت ءُ شھید کنت داں آ پاکستان ءِ اے رستریاں چہ وتی زُبان ءَ درشان کُرت مہ کنت۔
آئی گْوشتگ کہ اگاں ھمساھگیں ڈیھ،جھانی توانمند ءُ مردمی اگبالانی تْرامگیجاں ھمے وڑ ءَ پاکستان گِر ءُ دار نہ کُرت ءُ بلوچ چکچینی ءَ بےتواربوت اَنت گڑا بلوچستان ءَ مردمی ناگیگی یے گیش بیت ءُ پاکستانی لشکر چہ بنگلہ دیش ءَ گَنتریں زوراکی کنت ءُ بلوچ راج ءِ چکچینی ءُ مُچی سزا ءِ دُرسیں سیمسراں گْواز کنت۔