گوادر ءَ برجاھیں “حق دو بلوچستان تحریک” ءِ ھمراھداری ءَ کراچی ءِ مھلوک ھم دگانی سرءَ در اَتکگ اَنت۔
جھانگیر روڈ ءَ حق دو بلوچستان تحریک ءَ گوں یکجاھی درشانگ ءِ ھاتر ءَ روانک کشگ بیتگ، روانک ءَ بھرزیروکیں مردمانی دست ءَ پلے کارڈز بیتگ اَنت کہ اِشانی سر ءَ دریاورداں ھوار بلوچستان ءِ درگت ءَ اوگام نبشتہ بیتگ اَنت۔
روانک ءَ گوں ٹیلیفون ءِ سر ءَ تران کنان ءَ مولانا ھدایت الرحمن بلوچ ءَ گُشتگ کہ ھروھد ءَ بلوچستان ءَ زلم بیتگ کراچی ءِ مھلوک ءَ زلم ءُ زوراکیانی بگیری ءَ توار چِست کُتگ گوستگیں ھپتاد سالاں چہ بلوچستان ءِ سر ءَ زوراکی برجاہ اَنت۔
آئی ءَ گُشتگ کہ گوادر ءَ زھرشانی جُنز ءِ ھلاپ ءَ پندل ءِ جوڑینگ ءُ ماھیگیر مڑینگ بئیگ ءَ اَنت۔ سندھ ءِ ماھیگیراں ھوار درستیں تکاں چہ سیادی داروکیں مردماں لوٹ ایت کہ مئے ھمراہ دار بہ بنت۔
مولانا ھدایت الرحمن بلوچ ءَ جار جتگ کہ آ ھمے زیتاں کراچی ءَ ھم کیت۔
کماشیں رھشون حسین واڈیلہ ءَ وتی تران ءِ تہ ءَ بلوچستان ءِ توار ءَ گوں ھم توار بیگ ءِ سر ءَ کراچی ءِ ورنایاں ستاشانی درشان کُتگ ءُ گُشتگ یک شور یے ءِ پد ءَ جُنز ءِ ھلاپ ءَ پندل سازش بیگ ءَ اِنت بلے پندل سازوک بے سوب بیتگ اَنت ءُ جُنز گیشتر ودگ ءَ اِنت۔
روانک ءَ گوں تران ءَ کنان ءَ نثار موسیٰ، ابوبکر بلوچ، ایڈووکیٹ شکیل بلوچ، ایاز بلوچ ءُ دگراں گُشتگ کہ کراچی ءِ مردم بلوچستان حق دو تحریک ءَ گوں سرجم ءَ یکجاھی ءُ ھواری برجاہ دار اَنت۔
آیاں لوٹ کُتگ کہ بیگواھیں مردم یل کنگ بہ بنت، پھازگی ءِ نام ءَ دریاوردانی کم شرپی ھلاس کنگ بہ بیت ءُ بلوچستان ءَ ھوار کراچی ءِ بلوچ دمگاں چہ ھم منشیات ءِ باپار بند کنگ بہ بیت۔