کسانسالیں کفایت اللہ یل کنگ بہ بیت- کھول

بلوچستان ءِ دمگ ھاران ءِ جاھمنند کسانسالیں کفایت اللہ ءِ کھول ءَ رسانکدراں وتی شنگ درشان ءِ تہ کفایت اللہ ءِ یل کنائینگے لوٹ کُتگ ءُ زھرشانی کنگے جار جتگ –

کھول ءِ گوشگ انت کہ نُھ دسمبر ءَ پنچ شمبے روچ ءَ کسانسالیں کفایت اللہ ءِ یل کنائینگے ھاتر ءَ ھاران ءِ پریس کلب ءِ دیم ءَ بنجل ءِ جنگ بیت اِنت –

آئی ءِ کھول ءَ درسیں راجداریں گل، سول سوسائیٹی، وکیل ءُ دگہ تک ءُ پھناتاں سیادی داروکیں مردماں زھرشانی بنجل ءَ ھوار بوھگے لوٹ کتگ –

کھول ءِ رِد ءَ کفایت اللہ ءَ سال دوھزار ھژدہ ءَ گچین کاریانی روچ ءَ آوار جنگ ءُ بیگواہ کنگ بوتگ کہ آئی ءِ اُمر یانزدہ سال انت –

آھانی گوشگ ات کہ سَے سالاں چہ بیگواہ انت ءُ اے سئیں سالاں سرکاری ادارہ چی کنگ انت کہ کسانیں زھگ ءِ شوھاز کُرت نہ کن انت؟

آھانی گوشگ ات کہ دمگ ءُ چپ چاگرداں ھر وڑیں سیکورٹی ادارھاں ابید کفایت اللہ ءِ ھچ سرپدی نیست اِنت –

زورانسری آوار جنی ءِ بگیری ءَ کھول ءَ کفایت اللہ ءِ پہ وشی یل کنگے ھاتر ءَ زھرشانی کنگے پیسلہ کتگ ءُ گوشتگ کہ زھرشانی ھاران ءَ ھوار شال ءَ ھم زھرشانی کنگ بیت اِنت اگان ھنگت آ یل کنگ نہ بوت گڈا دیم پہ اسلام آباد ءَ رؤئیں –

آھاں چہ انسانی ھکانی گلاں چہ لوٹ کُتگ کہ زھگے یل کنائینگ ءَ وتی کرد ءَ پیلو بہ کن انت –