نبشتانک: یک نمدی یے پہ منی بلوچی ءِ استاد ابدلستار بگٹی ءِ نام ءَ
نبشتہ کار: بالاچ واهد
دی بلوچستان پوسٹ
دروت ءُ درهبات ئے استاد جان. من تئی جان ءِ سلامتی ءَ لوٹ آں ، ءُ مُدام وش ءُ سلامت بات ئے ءُ مجتی وشیانی جمبر تئی سر ءَ ساهیل بات انت۔ استاد جان من ترا هال دیگ لوٹ آں کہ من نمدی کدی ھم نبشتہ نہ کتگ ءُ نَیکہ من نبشتہ کنگ ءَ وَ زان آں بلے مرچی دل ءَ گْوشت کہ زَلور نمدی یے نبشتہ بکن۔ گُڑا من وتی ند ءُ یک ساپیں تاکے زُرت ءُ نبشتہ کنگ بنا کت بلے من زانگ ءَ نہ اَت آں کہ زاناں چی نبشتہ بکن آں ءُ چی نبشتہ مہ کن آں۔
گڑا گُڈسری من جیڑ ات کہ یک لُکّیں نمدی یے نبشتہ بکن آں بلے پہ کے ءَ اے لُکیں نمدی ءَ نبشتہ بکن آں؟ یک برے پد ءَ جیڑ ات ءُ گڑا دل ءَ گُشت اے تئی اولی نمدی انت کہ تو وت ئِے نویسَگ ءَ ئے گڑا پہ وتی راجی زُبان ءِ استاد ءَ بہ نبیس ئِے کہ آئی ترا بلوچی ءَ هیل داتگ ءُ مرچی تو کمو نبشتہ کنگ زان ئے گڑا اول هما ءُ رند ءَ تئی جند ءِ جُهد ءِ برورد اِنت کہ تو دربرگ بوتگ ئے۔ استاد من ءَ پَهّل کن کہ منی کِر ءَ هچ لبز نیست انت پہ تئی ستا، توسیپ ءُ ساڑیگ ءَ چیزے نبشتہ بہ کن آں پرچا کہ تو هما وانینوک ءُ سوج دیوکاں یک بوتگ ئے۔ استاد جان تئی سگ ءُ اوپار ءَ را ھم سد سلام انت کہ پہ نودربراں ءُ شاگِرداں تو سک سرسوج کن ئے۔ من ءَ استاد تئی یک گپے سک دوست بیت وهدیکہ تو درونت ءَ روان دئے ءُ درونتانی گُڈسر ءَ اے نبشتہ ءَ اَنت “اے درونت ءَ دیم ءَ ھم روان بہ کن اِت، پہ راجی زُبان ءِ دیمروئی ءَ ما شُمئے مھر ءُ ھمراھداری لوٹ ایں، بلوچی وت بہ وان اِت ءُ راج ءِ نودربراں ھم وانین اِت’
گِند ئے اے گپانی سر ءَ هچ شک نیست انت کہ یک بلوچ نودربرے پہ ستک ءُ دل ءَ راجی زُبان ءَ بہ وان ایت گڑا آ وت هیل کنت چے ءَ کہ ما وتی ماتی زُبان ءَ وت ونت وَ کن ایں ءُ چوناھا آئی ءِ سکیں مزنیں درور من وت آں ، من یک زری مکتبے ءَ ونتگ کہ اود ءَ گیشتر انگریزی ھژدری ءُ زلوری زانگ بوتگ ءُ انگت بیت پمیشکا زَری مکتبانی تہ ءَ هندی وانگ کم بیت۔ اود ءِ نودربر هندی ءَ هیل گپت نہ کن انت ءُ همے سوب انت کہ بلوچی ءِ نبشتہ ءَ ھم نابلد بہ انت بلے اگاں مرچی من اے لُکیں نمدی ءَ نویسگ ءَ آں گڑا مستریں سوب ابدلستار بُگٹی انت ءُ آئی ءُ وٹسیپی وانگجاہ اَنت کہ من همود ءَ بلوچی هیل گپتگ ءُ کمو کمو نبشتہ کنگ زان آں۔
اے ابدلستار بُگٹی ءِ وتی مهر اَنت کہ وٹسیپی گَل ءُ دیوان اڈکتگ ءُ راج ءِ نودربراں بلوچی وانینگ ءَ انت. من آئی ءِ سد لَک منتوار آں کہ آ وتی گَرانباهین ءُ کیمتیں وهده ءَ کش ایت مئے وڑیں نابلد ءُ نازانتکاراں بلوچ راجی زُبان ءَ وانینگ ءَ انت ءُ سرپدی دیگ ءَ انت.
استاد تو مُدام سلامت بات ئے ءُ داکٹر هنیپ هر وهد ءَ گْش ایت بلوچے بات ئے من ترا ھم وتی نمدی ءِ تہ ءَ گْش آں بلوچے بات ئے ، اے گپ ءَ من وَ زان آں کہ تو یک راجدوستیں بلوچے ئے ءُ پہ راجی زُبان ءِ دیمروئی ءَ تو وتی جُهد ءَ کنگ ءَ ئے کہ بلوچ راج ءِ نودربر ءُ لس وانِندگ راجی زُبان ءِ نبشتہ ھیل کن اَنت بلے پد ءَ ھم بلوچے بات ئے ءُ اے گامگیج ءَ ءُ اے جُهد ءَ یکشل ءَ برجاہ ءُ جاڑی بدارات ئے ءُ دومی باید اِنت ما بلوچ نودربر ھم تئی ھمراھداری بہ کن ایں۔ راجی زُبان ءِ درونتاں وانان ءَ بلوچی نبشتہ سْیاھگ ءَ وت دربر ایں ءُ بلوچی وٹس ایپی وانگجاھاں اڈکنان ءَ راج ءَ ھم بہ وانین ایں۔ بزاں ھر کسے کہ نبشتہ کنگ زانت گُڑا راج ءَ راجی پجّار بزاں بلوچی ءَ بہ وانین ایت۔
نمدی ءِ گڈی ءَ گڑا گشگ لوٹ آں هر کج ءَ ئے مُدام جاندْراھ ءُ سلامت بات ئے، اِمرُوز ءَ ھچبر گم مہ گندات ئے …
تئی کستر ءُ نودربر، بالاچ واهد
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔