دارو خان ابابکی ءِ لوگی ءَ گوشتگ اگاں لوگواجہ کتکار انت آمیدگس ءَ آرگ بہ بیت

بلوچستان ءِ بنجاھی شھر شال ءَ پریس کلب ءِ دیم ءَ سردار دارو خان ابابکی ءِ لوگی ءَ پریس کانفرنس ءَ تران کنان ءَ گوشتگ کہ منی لوگ واجہ سردار دارو خان ابابکی بیست ءُ ھشت ستمبر سال دوھزار ءُ دہ ءَ سریاب مل اسکیم ءَ چہ مئے جند ءِ گِس ءَ زورانسری آوار جنگ ءُ بیگواہ کنگ بوتگ – آئی ءَ گوشتگ کہ ما رسانکدر ءُ آمیدگساں ھوار ھر تک ءُ پھناتاں وتی توار چِست کتگ گوشتگ کہ اگاں منی لوگ واجہ ءِ سر ءَ ھر وڑیں کیسے ھست گڑا آمیدگس ءَ آرگ بہ بیت بلے انگت منی لوگ واجہ سردار دارو خان ابابکی یل کنگ نہ بوتگ –

دارو خان ابابکی ءِ لوگی ءِ رِد ءَ آئی ءِ کسانسالیں زھگ سردارزادہ محمد انور ابابکی ءَ وتی پت ءِ یل کنائینگے جھد برجاہ داشتگ بوتگ، آئی ءَ وتی وانگ ھم سرجم نہ کُتگ بیتگ بلے منی لوگ واجہ سردار دارو خان ابابکی یل کنگ ءِ بدل ءَ منی کسانسالیں زھگ ءِ جون من ءَ سوگات کنگ بوتگ – منی چُک پانزدہ اکتوبر سال دوھزار ءُ نوزدہ ءَ روچ رھمانی شال ءَ شریپ آباد چار راہ ءِ سر ءَ تیرباران کنگ ءُ شھید کنگ بوتگ – آئی ءِ ارزی نمبر 2019/ 126 شالکوٹ تانہ ءَ ما نبشتہ کنائینتگ آ ارزی ءِ پیسلہ روچ مروچی کنگ نہ بوتگ –

آئی ءِ گوشگ ات چاردہ جون سال دورھزار ءُ بیست ءُ یک ءَ یکرندے پد ءَ مئے نزیکیں سیاد ٹکری حمزہ ابابکی مئے لوگانی نزیک ءَ آئی ءِ سر ءَ تیرگواری کنگ ءُ شھید کنگ بوتگ ءُ آئی ءِ دو ھمراہ زدگ بوتگ انت آئی ارزی نمبر 2021 /109 نیو سریاب تانہ ءَ نبشتہ کنائینتگ – منی کسانسالیں زھگ سردارزادہ انور ابابکی ءُ نزیکیں وارس ٹکری حمزہ ابابکی ءِ مانشانی ھاک دنیگت ءَ ھُشک نبوتگ انت کہ بیست ءُ یک نومبر سال دوھزار ءُ بیست ءُ یک ءَ مستونگ ءِ دمگ ولی خان ءَ منی وسِرک سردارزادہ میر محمد خان ابابکی ھمراہ ءِ لقمان ابابکی، رحمت اللہ مینگل، سلیم ابابکی، یحییٰ ابابکی ناشناسیں ناشرکاراں سربازار شاھدگ ءِ سر ءَ تیرباران کُتگ شھید کتگ انت ءُ آھانی دوھمراہ نعمت مری ءُ قدیم ابابکی اُرش ءَ زدگ بوتگ انت اے وئیل ءِ درگت ءَ ما ولی خان لیویز تانہ ءَ ارزی نمبر 2021 /34 نبشتہ کنائینتگ – آئی ءَ گوشتگ چاگردی ترامجاھاں آڈیو توار ءِ شنگ کنگ بوتگ ءُ اے وئیل زمہ واری زُرتگ ءُ کُشندھاں ھمے توار بازیں وٹسپ گروپانی تہ ءَ ھم تالان کتگ ما ھمے درسیں راستی واکدارانی گوم ءَ شئیر کُتگ انت بلے مستونگ ءِ واکداراں اے دردناکیں وئیل ءَ ھواریں کتکار ناکہ دزگیر کتگ ناکہ اے درگت ءَ پٹ ءُ پول ءَ مارا ءَ سرپد کنگ بوتگ –

بیگواھیں سردار دارو خان ابابکی ءِ لوگی ءِ گوشگ ات کہ اے یکشل ءَ بوتگیں وئیلاں پد ما وتی گِس ءَ چہ دراتک نہ کُتگ وتی پھریز ءَ ما چُنڈے نگن ءِ ھم چمدار بوتگ انت اے پدردی وئیلانی درگت ءَ سرکار ءَ نہ مئے گوم ءَ دلپدردی درشان اتگ ناکہ چُشیں گامگیجے زورگ بوتگ دومی نیمگ ءَچہ اے ارزیاں ناکہ چشیں گامگیج ءِ زورگ بوتگ ءُ مارا سرپد کنگ بوتگ –